TUMANDO NOTA KU TIN INTENSHON NO POSITIVO PA START UN DISKUSHON RIBA NIVEL DI LUSHIKLAS TOKANTE USIBO EN BES DI DUNA INFORMASHON SANO I RIBA NIVEL NA NOS KLASE TRAHADÓ I E KOMUNIDAT

Kralendijk,- Pakiko i aun mas importante e motibu di eksistensia di USIBO, mi kier komparti ku komunidat i e klase trahadó kiko tin tras di lantamentu di USIBO den añanan 2012 i ku te awe USIBO ta hunga e ròl sentral i sumamente importante komo e BOS di e klase trahadó den desaroyo sosial ekonómiko/ekológiko duradero i sostenibel di Boneiru.

Konvenshon 144 di Organisashon Internashonan di Labor, ILO adoptá na 1976 i re-ratifiká na 2023 su meta ta pa apoyá e efektividat i efisiensia pa implementá kriterianan internashonal di labor atraves di konsulta i diálogo struktural entre tres pilar, esta Gobièrnu, Dunadó di trabou i Sindikalismo(trahadónan). Ulanda ta miembro di ILO i a ratifiká e konvenshon aki.

Ademas Ulanda komo miembro tin ku raportá anualmente desaroyonan riba tereno laboral. Desde 10-10-10 Boneiru a bai forma parti integral di Ulanda, pero mirando su posishon geográfiko ta hiba su propio maneho sosial-ekonómiko.

Na 2012 a lanta e idea pa por kumpli ku e konvenshon aki den un forma realistiko na Boneiru, lo ta rekomendabel pa sindikatonan uni den un organisashon aki na Boneiru mes, ya ku Antia a stòp di eksistí. I mirando ku tabatin bastante potenshal sindikal na Boneiru mes, e inisiativa aki a risibí sosten di 6 sindikato aki na Boneiru, esta AFBW, ABVO-Boneiru, FEDEBON, BPWU, PWFC i SIMABO. E promé muestra di e UNION aki a keda establesé ku selebrashon konhuntu di tur e sindikatonan dia 1 di mei 2012 den kurá di AFBW.

A invitá komo huespet speshal e dia ei e organisashon di penshonadonan na Boneiru, ku tabata UPAH. E dia ei a duna honor na un kantidat di presidente i eks-presidentenan di sindikalismo na Boneiru pa nan trabou, dedikashon na e trabou sindikal, pero alabes a mustra riba e era nobo ku lo bai kuminsá awor ku Boneiru no ta forma parti mas di Antia.

E promé akshon ku a surgi ta pa lanta e plataforma tripartit i a kuminsá hiba kònbersashonnan informal ku gezaghèber di e tempu ei i tabata durante un diskurso di diputado Servilia Janga riba 1 di mei 2013 ku a tuma e desishon pa ban lanta un Diálogo Nashonal den e espiritu di ILO. Na 2016 a formalisá e UNION aki statutariamente dilanti notario Kenneth Arends i USIBO a bira legalmente e BOS DI E KLASE TRAHADO DEN DIALOGO SENTRAL. Esaki ta nifiká segun e regla i proseduranan di ILO ku no por pasa lei i reglanan nobo i sigur no laboral sin konsultá promé ku e Dialogo Sentral pa segurá ku tur e tres partidonan tin un bos den e proseso di toma di desishon.

E ta garantisá ku tur e tres partidonan ta na mesa a base di igualdat ku mesun derechonan. E ta enserá ku e partnernan mester di sosten i formashon pa segurá ku nan ta partisipá riba nivel i ku nan partisipashon ta efektivo i efisiente. Na 2023 a re-ratifiká e konvenshon aki i ela keda akseptá mundialmente pa su importansia.

Ta den e plataforma aki ta dialogá entre otro riba mehorashon di kondishonnan i sirkumstansianan laboral mundialmente i ku kada pais afiliá tin e obligashon di implementá esakinan den nan legislashon i ku esaki sindikalismo ta haña kuminda na momento di negoshá kontratonan kolektivo ku e kompanianan na unda e sindikato tin representashon.

Ta pa e meta aki a lanta USIBO i ta e meta aki te ku awe USIBO ta sirbi den Dialogo Sentral ku ta na probecho di tur trahadó na Boneiru i hasta na Saba i Statia sea bo ta miembro òf nò di un sindikato. I logronan di USIBO den Diálogo Sentral ta pa tur sindikato na Boneiru na Saba i Statia sea e sindikato ta miembro afiliá òf nò na USIBO.

Mi ta duna solamente un ehèmpel. E oumento di sueldo minimo supstansial ku a logra ku e akseptashon di e Akuerdo di Kralendijk den programa di gobernashon Ulandes a konta pa tur trahadó na Boneiru, sea miembro o nò di un sindikato.

Ela yuda tur sindikato sea miembro o nò di USIBO pa drecha e kas salarial di tur empresa kaminda tin un CAO, inkluso RCN i OLB. Pues USIBO gusta òf nò ta e pal’i mata grandi ku frutanan ta kologá na dje sufisientemente abou pa tur trahadó i tur sindikato piki. E eskoho di ta miembro òf nò di un sindikato i e eskoho di un sindikato di ta miembro òf nò di USIBO ta un derecho fundamental ankrá den nos konstitushon.

E ta demonstrá si solamente e grado di madures i nivel di konsiensia ku e trahadó  i tambe e liderato sindikal a yega den su desaroyo i ku si realmente e ta konsiente ku ser sindikalista ta pa sirbi e kousa laboral i no e kousa personal.

I mi ta bolbe ripití e ekipo ta mes fuerte ku e fuerte ku e individuo ku ta forma parti di e ekipo ta. I kompañerismo i solidarismo solamente bo por demonstré dor di forma parti di e ekipo, ser leal na e ekipo i no pará pafó hunga viktima.

FUENTE: NÒCHI WILLEM