NOS A TUMA NOTA DI UN DEKLARASHON KASI POÉTIKO DI ENTIDAT PÚBLIKO DI BONEIRU PA MEDIO DI E SERVISIO DI KULTURA SKAL, KU E AÑA AKI LO NO TIN ‘CHISPA DI WAN KU PEDU’.

Kralendijk,- E evento ku normalmente ta marka e inisio alegre di e fiestanan di San Juan i San Pedro, no ta tuma lugá e aña aki mas i entidat públiko di Boneiru ta hasi un yamada pa reflekshon i konektividat – un yamada pa meditashon i unifikashon.

Tumando na kuenta e sirkumstansianan di último tempu bo kolumna lo a pará 100% tras di e desishon. Pero nos tin informashon ku dos di e tres diputadonan no tabata riba e isla ora e marcha silensioso a tuma lugá.

Unda e dos diputadonan  tabata ta ora ku komunidat a bin hunto pa mustra solidaridat, pa reflehá huntu riba e sentimentu di inseguridat i pèrdidá di un di su hóbennan? Nan lugá tabata aki, meimei di e hendenan ku nan ta representá.

E falta di solidaridat aki ta un bòftá den kara di pueblo. Lidernan mester mustra ku nan ta pará ku nan komunidat, no solamente ku palabra, pero spesialmente ku akshon. Nan ousensia ta un deskonsiderashon doloroso pa e preokupashon- i emoshonnan di e siudadanonan ku nan mester di representá.

Pero kon a para ku konseho insular mes? Mester bisa ku awor si e maskarada a slep for di nan kara ku eksepshon di e miembro di MPB ku ta Hennyson Thielman ku desidídamente no a partisipá na e sirku aki mirando kiku ta pasando riba e isla. E kara di e otro miembronan di konseho insular ta mustra friu, manera eis i indiferente.

Miéntras ku un grupo grandi di habitantenan a marcha silensiosamente dor di e kayanan pa ekspresá nan indignashon tokante e oumento di ola di violensia riba e isla – un erupshon sosial ku ta sintá mas profundo ku djis kriminalidat – nos konseho insular alegremente a skohe pa bula bai Hulanda un biaha mas.

No pa bati alarma riba e tristesa di nos komunidat. Pero pa sigui ‘entrenamentunan’, ‘profundisá relashonnan’, i ‘partisipá den konferensianan’.

Anto gobièrnu a kai na Hulanda. Den serio?

E bishita di trabou di 13 pa 28 di yüni ta lesa manera un schoolreisje. For di un tòp di BES pa konferensia di VNG, for di bilateralnan pa asina yamá netwerkborrels. Kiermen bebementu. Tur kos ta zona hopi profeshonal – pero e tristu ta ku nan no ta realisá ku e isla ta kimando. Literalmente i figurativamente. Mientras ku Davidlee Winklaar ku un bos kibrá a grita e palabranan “Ta basta!” i a pidi pa konekshon, no tabatin ni un miembro di konseho den e multitut ku eksepshon di Hennyson Thielman di MPB. Ni un man riba un skouder.

Ni un orea den bientu. No tin rèspèt pa e dolor ku komunidat ta pasando aden.

Biniendo bèk serka kolegio ehekutivo, ta inaseptabel ku e diputadonan di Boneiru ku mas eksperensia tabata ousente durante e marcha silensioso, ora ku nan mester a mustra nan liderazgo.

En bes di esei, nan a laga tur kos riba skouder di nan kolega ku ménos eksperensia – un hende ku tin solamente un aña i mei riba e isla i ku ainda mester siña kon e dinámika polítiko i sosial ta funshoná aki.

Unda e asina yamá lidernan tabata?

Dikon nan ta kana bai ora nan presensia ta mas nesesario? Esaki no ta goberná, esaki ta envadí responsabilidat.

E komunidat meresé mandatarionan ku no solamente ta para na promé plano ora ta kumbiní nan, pero tambe mester tei ‘eerste rij’ i para stret den momentunan difísil di e pueblo.

E marcha silensioso tabata pa traha espasio pa reflekshon, kontemplashon i luto. Un akto silensioso pero hopi digno.

Na mes momento, e imágen di miembronan di konseho insular ku ta post selfies for di Den Haag i hasta riska bisa ku ta pa pueblo nan ta traha, manera ta un sakrifisio grandi nan ta hasi pa e pueblo, ta ilustrá e grado haltu di chèrchè ku nan ta hasi di e pueblo.

E deskonekshon no por ta mas grandi.

En bes ku e 8 miembronan di konseho insular anulá e biahe pa Hulanda, pió ainda ku e gobièrnu di Hulanda a kai i na òktober lo tin elekshon,  ta mustra un deskonekshon total ku e pueblo i dimes nan a laga un chèns grandi pa konektá ku e pueblo i mustra nan kompromiso.  E falta di solidaridat real aki ta hopi ilustrativo.

 Miéntras e 8 miembronan di konseho Insular ta hisa bandera di keirumento  atministrativo riba suela hulandes, kayanan di Kralendijk a yena ku hendenan ku realmente i berdadermente ta sinti algu pa e pida baranka aki ku yama Boneiru.

Dia 17 di mart 2027, pues aki na un aña i 9 luna masoménos tin elekshon pa konseho insular. Keda kòrda kiku e 8 miembronan i dos diputado a hasi ku Boneiru ora Boneiru mas tabata mester di nan.

FUENTE: WILLEM CECILIA