A TOPA KU VIOLASHON NA DOS SUPERMERKADO

Kralendijk –  Riba djárason 18 di yüni 2025 Inspektornan di Direktorado di Supervishon i Mantenshon di Lei di Entidat Públiko Boneiru a hasi kontròl na dos supermerkado.

Durante e inspekshonnan , nan a topa ku vários violashon riba tereno di benta di komestibel i di etiketa ku informashon di e produkto.

Fecha di vensementu na e promé supermerkado

Den e promé supermerkado e inspektornan a mira ku tin komestibel riba e rèkinan, di kua e fecha mas tardá di vensementu a pasa pa basta tempu kaba.

Esaki no ta pèrmití. Segun e reglanan den e Dekreto di Etiketa riba Komestibel BES, artíkulo 2, ta prohibí pa bende komestibel òf bebida si e fecha mínimo òf e fecha pa mas tardá di vensementu a pasa.

Etiketa robes na e di dos supermerkado

Na e di dos supermerkado e inspektornan a deskubrí ku vários produkto no tabatin etiketa korekto. Algun etiketa no tabat’ei mes i otronan tabata na un otro idioma ku no ta pèrmití.

Segun lei tur etiketa mester ta klaramente visibel, fásil pa lesa i no mester eliminá/kita loke tin skirbí riba nan. E informashon mester ta en todo kaso disponibel na hulandes, papiamentu, ingles òf spañó.

A konfiská e produktonan

Mesora den tur dos supermerkado e inspektornan a konfiská e produktonan ku violashon. A tuma e medida akí pa protekshon di salubridat públiko i pa evitá ku konsumidónan ta kumpra komestibel ku informashon defisiente riba dje.

Komestibel seif ta importante

Direktorado di Supervishon i Mantenshon di Lei ta enfatisá ku ta hopi importante pa supermerkadonan kumpli ku regla. Esaki ta nesesario pa protehá salú i siguridat di tur habitante i bishitante di Boneiru. E direktorado ta sigui komprometé su mes pa un komunidat seif i salú.

FUENTE: OLB/LIVE99FM

NEDERLANDS:

OVERTREDINGEN GEVONDEN BIJ SUPERMARKTEN

Kralendijk – Inspecteurs van de Directie Toezicht en Handhaving van het Openbaar Lichaam Bonaire hebben op woensdag 18 juni 2025 controles uitgevoerd bij twee supermarkten.

Tijdens deze inspecties zijn meerdere overtredingen gevonden op het gebied van voedselverkoop en etikettering.

Verlopen houdbaarheidsdata bij eerste supermarkt

In de eerste supermarkt zagen de inspecteurs dat er eetwaren in de schappen lagen waarvan de uiterste houdbaarheidsdatum al lang voorbij was.

Dit is niet toegestaan. Volgens de regels in het Besluit etikettering van levensmiddelen BES, artikel 2, is het verboden om voedsel of drank te verkopen als de minimale of uiterste houdbaarheidsdatum is verstreken.

Verkeerde etiketten bij tweede supermarkt

Bij de tweede supermarkt ontdekten de inspecteurs dat meerdere producten geen correcte etiketten hadden.

Sommige etiketten ontbraken helemaal, andere waren alleen in een andere taal dan is toegestaan. Volgens de wet moeten etiketten duidelijk zichtbaar, goed leesbaar en niet uitwisbaar zijn.

De informatie moet in ieder geval beschikbaar zijn in het Nederlands, Papiaments, Engels of Spaans.

Producten in beslag genomen

De inspecteurs hebben in beide supermarkten de producten met overtredingen direct in beslag genomen. Deze maatregel is genomen om de volksgezondheid te beschermen en om te voorkomen dat consumenten slecht geïnformeerd voedsel kopen.

Veilig voedsel is belangrijk

De Directie Toezicht en Handhaving benadrukt dat het heel belangrijk is dat supermarkten zich aan de regels houden.

Dit is nodig om de gezondheid en veiligheid van alle inwoners en bezoekers van Bonaire te beschermen.

De directie blijft zich inzetten voor een veilige en gezonde samenleving.