in

SUPER ORGUYOSO I GRADISIDO SINDIKALISMO TA PA E ECHO KU E ESFUERSO, E ENERGIA, E DEDIKASHON I HASTA E SAKRIFISIO KU TA INVERTÍ DEN E PROSESO PA KONSIENTISÁ E KLASE TRAHADÓ KU SU FORSA TA SINTÁ DEN UNION,

Kralendijk,- Ka dunando resultado bisto, tangibel i konkreto. Ta na su fruta bo ta konosé e palu i ta ku akshonnan konkreto i no ku palabra bo ta konosé frutanan sindikal.

Ku pruebanan sindikalismo ta demonstrando ku hibando un sindikalismo modèrno, konstruktivo, agresivo usando profeshonalismo i ku argumentonan sano i bálido nos ta ganando e rèspèt i rekonosementu ku e klase trahadó meresé komo parti integral den e desaroyo sosial-ekonómiko di Boneiru.

E rekompensa ku e aserkamentu aki a i ta produsí a bolbe keda demonstrá den e siman tras di lomba. A firma no ménos ku 3 CAO den shete dia. Antó kada un CAO di akuerdo ku e posishon di e kompania riba nos merkado laboral i su kontribushon den nos ekonomia.

Primeramente dia 6 di yüni a firma e promé CAO den e sektor di seguridat aki na Boneiru. Sektor di seguridat ta un sektor di gran importansia pa loke ta seguridat di propiedatnan den nos ekonomia. I seguridat bo ta garantisá dor di tin empleadonan motivá, entrená, alerta pa por ehersé nan labor den sirkumstansianan difisil i hasta bou di sirkumstansianan peligroso.

No balotá e trabou speshalmente den oranan di anochi/mardugá ku ta eksigí hopi di e trahadó na warda. I pa tal rason sindikalismo a logra konvensé e promé kompania di seguridat ki importansia tin pa trahadónan den e sektor aki tin bon kondishonnan di trabou, pero tambe ku mester traha riba bon sirkumstansianan laboral pa garantisá nan nan salú i nan seguridat.

Mi ta konvensí ku lo no dura muchu mas ku trahadónan di e otro kompanianan di seguridat tambe lo realisá esaki i ku solamente den UNION sindikal nos huntu ku nan dunadó di trabou lo por logra esaki ku éksito.

Djaweps dia 12 di yüni den oranan di atardi a firma un CAO di transishon ku BONLAB NOBO. Un Bonlab ku danki na esfuersonan sindikal, konbiná ku gerensia di Bonlab, Bonaire Holding Maatschappij i tambe Konseho Insular i Kolegio Ehekutivo nos a logra lanta BONLAB for di kama di morto, despues ku Ulanda su ministerio kier a kometé eutanasia ku nos úniko laboratorio. A konbertí e Bonlab di un sentro di prek sanger pa análisis médiko pa un laboratorio ku lo ta na servisio di salubridat públiko en general i kaminda ta hasi tèstnan riba kuminda, awa, medio-ambiente (awa, tera i aire) pues un tereno di trabou muchu mas amplio i ademas ta sigui ta e sentro pa prek sanger pa finnan médiko. E transishon aki a eksigí un kuerpo di personal kompletamente entrená pa por brinda  riba nivel profeshonal un kalidat di servisio haltu.

Pues ela eksigí kondishonnan laboral adaptá na e situashon nobo i komo tal AFBW i BONLAB a firma e CAO pa un aña pa asina nos por monitoriá henter e transishon aki inkluso e transishon di personal.

Finalmente djaweps riba e mesun 12 di yüni den oranan di anochi a firma na mi konsepto un di e mihó CAO aki na Boneiru pa loke ta kondishonnan laboral, ora ku despues di tabata den insertidumbre pa hopi aña bou di reglanan den un manual, kaminda ta e dunadó di trabou so por a hasi i deshasí, atrobe forsa di konvikshon sindikal a pone ku trahadónan di Contour Global a realisá ku nan defensa i protekshon ta mihó sirbi ora den UNION nan ta afiliá na sindikato i ku esei ta e forma adekuá pa nan representantenan sinta na mesa di negosashon komo partner igual i yega na e mihó kondishonnan posibel.

Un biaha mas a keda demonstrá e rèspèt i rekonosementu di e forma di hiba sindikalismo modèrno, ora ku u delegashon pisá di e gerensia madre di e kompania enkargá ku Mexico i henter Caribe mes a bin Boneiru i sinta na mesa di negosashon i yega na un akuerdo pa 4 aña kual ta duna ambos partido stabilidat i konsistensia pa por traha konhuntamente den un ambiente positivo na garantisá produkshon di koriente tantu tradishonal(mashin ku kombustibel) komo produkshon di koriente alternativa( bientu i solo) i asina kontribuí en grande komo ehèmpel na un medio-ambiente limpi na benefisio di kllma di nos planeta, pero alabes logra produkshon di koriente na preis mas barata posibel kual lo kontribuí en grandi na mantené nos kosto di bida abou.

Komo kordinadó di e negosashonnan mi kier yama danki pa e konfiansa ku trahadónan a pone den e sindikato, pero tambe den e tim negoshadó ku nan shopstewardnan na mesa kende a hasi un bon trabou i na tur momento a pensa i aktua kordando riba nan koleganan i no riba nan so.

Un gran pabien di kurason na tur trahadó na Boneiru di e 23 kompanianan ku tin afiliashon na AFBW pa a i ta pará firme den UNION pa nos sigui ku nos esfuerso i lucha pa mihó kondishonnan laboral i ku esei garantisá un merkado laboral den balansa kaminda ta reina hustisia sosial i ku kalidat di bida di e trahadó i su famia ta mihó sirbí.

FUENTE:NÒCHI WILLEM/LIVE99FM

What do you think?

Written by Redakshon

Leave a Reply

Your email address will not be published. Required fields are marked *

GIPHY App Key not set. Please check settings

DI 11 KOMPETENSIA DI LESA BÒI ANTOIN

TRIÁNGULO TA AKTUA KU SERO TOLERANSIA DURANTE DI ENTIERO VIKTIMA DI 15 AÑA DI TIROTEO FATAL