PABIEN NA USIBO I PABIEN NA ROGELIO CICILIA KU A BIRA E PROMÉ TRAHADÓ PA RISIBÍ E PROMÉ REKONOSEMENTU DI E YABI DI KURASHI.

Kralendijk, – Pabien na USIBO I pabien na Rogelio Cicilia ku a bira e promé trahadó pa risibí e promé rekonosementu di e YABI DI KURASHI ku USIBO a instituí komo algu históriko den sindikalismo aki na Boneiru. Hopi ta e komentarionan positivo ku nos a risibí hasta for di hermana isla Aruba i tambe sugerensianan pa loke te nòmber i e fecha di e evento aki. Den presensia di henter direktiva di USIBO, prensa boneriano i tambe invitadonan e nominado sr. Rogelio Cicilia a risibí e trofeo for di man di visepresidente di USIBO, sr. Angelo Vrolijk i akompaná pa e sertifikado for di e tesorero sr. Cherel Kwidama.

E biografia di sr. Cicilia tabata den man di presidente di USIBO, sra. Mavis Abrahams, miéntras ku e intenshon i motivashon di e dia históriko aki tabata na enkargo di e konsehero di USIBO, boso sirbidó Norwin Willem. Bunita tabata e palabranan di sr. Cicilia mes kende a bisa ku e no tin renkor pa loke a pasa. Al kontrali despues ku e portanan a sera tras di su lomba oportunidat nobo a habri ora ku e por a implementá den su propio kompania di seguridat  tur e ideanan ku e tabatin pa su koleganan den e kompania anterior ku no a alargá su kontrakt. Tambe mi ta sumamente kontento di tende ku e lucha su fruta ta ku djabièrnè awor dia 6 di yüni AFBW komo sindikato lo sera un CAO ku Delta Security Bonaire B.V. Kisas no tur kos a logra 100% pero mi tin sigur ku e base positivo a keda poné pa un mehorashon di kondishonnan laboral na e kompania. Mi mishon ta kumplí i mi ta spera ku otro kompanianan di seguridat lo sigui e ehèmpel aki.

Bonhata, e organisashon ku ta representá empresanan hotelero, restorantnan i cafeterianan a presentá resultado di un investigashon ku nan a laga hasi pa loke ta importansia di turismo pa ekonomia di Boneiru. E resultadonan a indika ku turismo a resultá e motor ekonómiko di mas grandi di nos isla. E sektor ta representá mas òf ménos 50% di e produkto interno brutu, mas ku mitar di tur trabou disponibel i 44% di entrada di impuesto lokal. Mas aleu e rapòrt ta indiká ku turismo ta di vital importansia pa Boneiru. Loke nos ta lamentá ku e rapòrt no a evaluá e parti esensial den e motor ekonómiko aki ku ta e forsa humano/laboral.

Banda ku turismo ta representá mitar di e labor disponibel, no a midi kuantu e turismo a kontribui na alsa kalidat di bida di nos trahadónan i nan famia. No  tin indikashon riba ki nivel e kondishonnan laboral i e sirkumstansianan laboral ta, esta ku nan a kana paso a paso ku e eksigensianan di e tempu modèrno. Nos a sinti falta di un kapitulo ku ta dediká na e nesesidat di formashon di nos trahadónan den e sektor ei pa nan tin mihó posibilidat di desaroyo personal pero alabes por kontribuí na alkansá e meta ku Bonhata su miembronan i gobièrnu di Boneiru a pone, esta pa krea turismo di kalidat.

Pues kita for di turismo di masa ku ta e direkshon ku nos ta bayendo fuertemente awor aki i ku ta poniendo preshon enorme riba nos infrastruktura i ta hasi daño na e produkto esta nos naturalesa i nos kultura. Turismo di kalidat ta kai lanta tambe ku e kalidat i nivel di servisio ku ta duna nos bishitantenan i einan no ta plaka, sino ta e forsa humano ta esensial. Sindikalismo a start kònbersashonnan ku Bonhata.

Ta di spera ku awor ku e rapòrt ta riba mesa lo kontinuá ku e kònbersashonnan ku e meta pa yega na un CAO pa e sektor kaminda por akordá kondishonnan básiko general pa tur trahadó den e sektor ei.

Un di nan sin duda ta entrodukshon di un penshun general. Huntu, esta empresario i sindikalismo lo por konstrui un industria turistiko di kalidat, di nivel i duradero ku ta garantisa pan riba mesa i ta duna un kontribushon balioso na nivel di bida den tur aspekto di nos komunidat. Ta ora pa mara forsa huntu i bisa ku nos ta boneiru i boneiru ta nos. EOportunidat ku ta presentá ta pone ku nos komo liderato responsabel  mester brasa ku dos man.

FUENTE: NORWIN WILLEM/LIVE99FM