FRENTE SOSIAL PROGRESIVO (FSP)A SIGIU E DESAROYONAN RONDÓ DI NOS KOMPANIA DI LIMPIESA SELIBON NV.

Kralendijk,- Varios topiko a bin dilanti manera retiro di Direktor di e kompania , kandela na lentfil , intervenshon di Representante di Reino den maneho di Selibon i un retraso grandi den pago di supsidio dor di Gobiernu na e kompania di limpiesa.

Un aspekto masha importante ku Konseho Insular i Kolegio Ehekutivo a lubidá riba dje ta e sushinan ku nos suidadanonan ta tira riba kaya.
Ta asina ku nos areanan pùbliko manera nos mondinan a bira sitio pa tira tur sorto di porkeria , siendo ku esakinan mester ta na lentfil.

Esaki ta un mahos bista pero ta menasá nos salú pùbliko tambe.
Boneiru ta konosí pa un isla limpi i bunita,lamentabelmente esaki a pasa pa historia.Malesanan manera entre otro Chichinguya i Denge ta ketu bai aktivo,esakinan ta biba den e sushinan ku ta wordu tirá den mondi.
FSP a disidi ku den kuadro di Bondoet buta man na obra i limpia un area hopi sushi den e area di Yatu Baku.

Net na entrada di e plantashi aki a haña ta bon di krea un lenfil ilegal.
Boter,bleki,plestik pero tambe tair i wasmashin tabata entre e sushinan ku miembronan di nos organisashon politiko a rekohé.

Ta ora pa esnan responsabel pa nos medio ambiente di Boneiru bira mas kreativo i traha riba prevenshon di e situashon inaseptabel ariba deskribí.

Nos ta spera ku esnan na poder sa di trese mehorashon den esaki.
Un danki di kurason na tur ku a juda ku e akshon di limpiesa aki.
Foto ta mustra miembronan di FSP den akshon pa tene nos isla limpi i bunita.

FUENTE: FSP/LIVE99FM