DIREKTOR MES A KITA FOR DI KADASTER

Kralendijk,- Resientemente BONERIANO a publiká un artíkulo den kua nos a amplia tokante inkietut den Kadaster. Awor, büró di prensa di Kadaster na Hulanda ta reakshoná i ta aklará ku na e momentu aki no tin niun investigashon tumando lugá den Kadaster aki na Boneiru.

Segun nan no tin investigashon dirigí riba iregularidat. Ta trata di kontrolnan regular. “Kadaster Boneiru ta forma parti di Kadaster Hulanda i ta partisipá den e prosesonan regular di kontrol”, e persona di kontakto ta reakshoná.  

Fuentenan di BONERIANO, a sigurá ku di un dia pa otro a kita e direktor anterior for di trabou. Büró di prensa ta splika ku e informashon aki no ta kuadra.

“Entrante 1 di mei 2025 sr. Holder no ta traha mas na Kadaster.

Den e último añanan, el a duna un kontribushon na Kadaster Bonaire i su komunidat ku hopi plaser. Sr. Holder a indiká ku ta tempu pa un siguiente fase. Holder mes a skohe pa pasa e batuta pa e siguiente generashon.”

Bon mirá, nan ta bisa ku no tin iregularidat. I e kambionan aktual di mando di Kadaster na Boneiru no tin niun influensia riba e proseso di trabou. Komunidat tampoko lo no sinti e efekto di esaki.

FUENTE: BONERIANO/LIVE99FM