Redakshon
Kralendijk,- E muhernan di Muhernan Fuerte, ta kondena fuertemente e atakenan públiko resiente di polítikonan frakasa, lokutor/konsehero di partido polítiko i sindikatonan, reportero di prensa Hulandés, hendenan ku ta buska atenshon i otronan, kontra nos organisashon i su liderato.
E comentarios de individiu sin kalifikashon ta kontra tur e evidensia i konklushonan di ekspertonan internashonalmente rekonosé.
E bósnan polítiko aki ta trata di kibra kredibilidat di ekspertonan kalifiká, inkluyendo: Raport Spies – Raport di Profesor Soons – Raport di Eksperto di Nashonan Uni Dr. Carlyle Corbin – Raport di Mr. Boersema – Raport di Mr. Eugene Abdul – Raport di outoridatnan legal i konstitushonal di Hulanda,Prof. Hoogers, Prof. Veenendaal i Prof. Oostindie.
Tur dokumentonan aki a wordu presentá na liderato mundial i paisnan miembro di Nashonan Uní. Tur ekspertonan y dokumentonan aki ta basa riba mentira? Ta spera ku pueblo lo keda ketu, soportando violashonnan di derecho humano?
Nos ke rekorda e sakrifisio personal eksepshonal di James Finies, fundador di BHRO I Pueblo Progresivo Uni , ku a bandoná su karera den banko komersial pa dediká su bida pa lucha Boneriano.
E a perde su trabou, kas, i famia, a sufri detenshon ilegal, vigilansia i intimidashon politiko, a sobrebibi tres intento di asesinato, i a lidera un protesta históriko di 222 dia, ku a resultá den e referendum di 2015 ku mas ku 65% di Bonerianonan a rechasá integrashon den Hulanda.
E akshonan aki no tabata en vano. E ta sigui, sin pago, sin miedo, pa trese e bos di Boneiru na Nashonan Uní I komunidat internashonal.
Nos, e muhernan di Muhernan Fuerte, ta enfatisa e yamada pa Boneiru wordo ofisialmente pone bek riba e lista di Teritorionan No-Autónomo di Nashonan Uní.
E status aki lo obliga Hulanda pa reportá tur anja direktamente na Nashonan Uní riba bienestar i desaroyo polítiko, kultural, ekonómiko, sosial, i edukativo di Boneiru. Tambe lo pone supervishon internashonal riba e Reino.
Nos, e Muhernan di Pueblo Progresivo Uni i Muhernan Fuerte, ta para firme ku James Finies — un bon hende, ku a entrega su mes pa hustisia i su pueblo Boneriano. Nos no ta bek. Nos no ta laga sera nos boka. E lucha pa hustisia, dignidat i derechonan di Pueblo Boneriano lo sigui.
Muhernan Fuerte – Ala Femenino Pueblo Progresivo Uni
Marjolein Finies – Joseline Thielman – Phenice Frans Piar – Davika Bissessar – Virginia Janga – Juliana Martillia – Elba Finies – Sarah Winklaar – Joyceline de Haak
FUENTE: BONAIRE HUMAN RIGHTS ORGANIZATION
GIPHY App Key not set. Please check settings