AWE DJALUNA 12 DI MEI 2025 TA KUMPLI EKSAKTAMENTE 2 AÑA KU PUEBLO BONERIANO A MANIFESTÁ PASÍFIKAMENTE DEN UNMARCHA DI SOLIDARIDAT

Kralendijk,- Representá pa diferente gremio, esta UNKOBON, Green Peace, tur partidonan polítiko, sindikatonan no afiliá na USIBO,

pero tambe sindikatonan di Saba i Statia i organisashonnan di Ulanda, manera FNV i otronan, inkluso prensa a manifestá pasífikamente kordiná pa Union Sindikal Boneriano, USIBO, den un marcha di solidaridat  ku un meta komun i kla definí, esta kibra e kadena di pobresa ku pa años tabatin esnan mas vulnerabel den nos komunidatnan di islanan BES preso.

E asistensia tabata masal i impreshonante i a logra su meta. Na oktober di 2023 e desishon a kai tantu serka ministerio di asuntunan di labor i sosial komo denTweede Kamer ku mester oumentá supstanshalmente e kompensahonnan sosial, esta ònderstant, pero tambe penshun di behes i pensun di biuda(o) i di huérfanó(a).

Kompensashon pa yu a keda oumentá i a duna un kompensashon pa internèt i tarifa fiho di awa i koriente. Kasnan te na sierto entrada tambe a haña un krèdito di Usd. 1300 pa aña pa por paga nan kuenta di koriente.

I no lubidá ku despues di años a korigí sueldo minimo pa esnan ku ta traha.

Un logro signifikativo pa loke ta nos sistema di hustisia sosial i pago hustu pa trabou. Un logro a base di un lucha di un pueblo pa un derecho ankrá den artíkulo 20 di nos konstitushon. Un logro pues pa un derecho fundamental humano.

Un logro ku ta konfirmá ku derecho bo no ta hañele komo regalo den un teblachi di oro, sino e ta eksigí sakrifisio, konvikshon i perseveransha. Un logro ku nos mester ta orguyoso di dje. Un logro ku a demonstrá i konfirmá ku ta nos mes mester lucha p’e i no por pidi ningun otro bin hasié pa nos. E ta un logro ku nos mester kuida i konservá i sigui ta alerta pa no kité for di nos i ku nos tur huntu mester sigui perkurá pa nunka mas mara nos na kadena ni hinka nos den e prisòn di pobresa.

E menasanan t’ei i ainda nos tin medidanan ku mester tuma pa evitá ku e logronan aki ta bai pèrdí.

Den su bishita promé minister Dick Schoof klaramente a toka e tema aki i a mustra ku tin fondonan poné disponibel pa kontra-arestá pobresa. Ela papia di seguridat di eksistensia.

Fondonan pa entre otro lanta transporte públiko ku tin años drumí den lachi. Fondonan pa stimulá produkshon di propio kuminda, esta plantashon, krio di besia i peskeria.

Ta sektornan ku ta produsí i ku ta di importansia banda di e idustria mayó ku nos tin esta turismo, pero ku ta un industria vulnerabel ku nos no por stèns solamente riba dje. Invershonnan den nos infrastruktura i mehorashon di kalidat di biba den nos bárionan ta aktividatnan ekonómiko ku gobièrnu lokal por stimulá e mihó arma kontra pobresa kual ta di yuda krea trabou digno pa su poblashon.

Ta esaki ta e señalnan ku ta indiká ku realmente nos kier subi riba e kaminda di muchu mas outogobernashon.

Ta e inisiativanan aki riba tur aspekto mester haña sosten inkondishonal di Ulanda, kaminda esaki ta nesesario. Ta esaki ta duna kontenido den un forma práktiko i konkreto na e obligashon di Ulanda komo pais atministradó di un teritorio ku ainda no a alkansá e grado mas haltu di outogobernashon.

Ta esaki Ulanda a huramentá i firma komo su deber sagrado i ankra esaki den e tratado di Nashonnan Uní bou di artíkuo 73 a te ku d. Nos mester tuma e inistiativa i nan mester kumpli i no al reves.

Desaroyo sosial-kultural ekonómiko di un pais ta ekspreshon di e derecho fundamental di outodeterminashon.

E ta e derecho eksklusivo di e pueblo i si e pueblo boluntariamente a duna un otro pais e pèrmit pa atministrá, esaki hamas ta nifiká ku e pais atministradó ta i por tuma over, sino simplemente e tin ku kumpli ku e obligashon sagrado di asistí, sostené i aportá na e aspirashonnan politiko, kultural sosial i ekonómiko di e teritorio ku e ta atministrá.

12 di mei 2023 lo keda den nos historia komo e fecha ku pueblo a lanta i eksigí su derecho, su aspirashon riba nivel di provishonnan sosial i e pais atministradó a kumpli. Esei ta e bèrdat ku no tin gùm pa boré for di e páginanan di nos historia.

I den esaki no tin duda ku mester rekonosé ku sindikalismo a hunga e papel di kordinashon i guia.

FUENTE: NÒCHI WILLEM/LIVE99FM