BONEIRU LO DEBUTÁ NA MISS TEEN UNIVERSAL BOU DIREKSHON DI FUNDASHON BIATA

Kralendijk,- Fundashon BIATA lo inisiá un página nobo den historia di Boneiru, komo ku nos ta prepara pa debutá ofisialmente den e evento internashonal Miss Teen Universal un plataforma global ku ta buska i kontrobuí na desaroyo di e futuro lidernan femenino den mundu di beyesa, kultura i publisidat.

Miss Teen Universal ta un evento internashonal ku ta uni paisnan di tur parti di mundu, ku meta prinsipal pa: kreá oportunidatnan real pa mucha muhé entre 14 i 19 aña pa briya, ekspresá su talento i kualidatnan, i kombertí den modelonan inspirador den su komunidat i mas ayá.

E sertamen no ta basá solamente riba aparensia, sino riba liderasko, edukashon, kulturanan di diferente nashon, desaroyo personal i komuníkashon.

Banda di esaki, Miss Teen Universal ta posishoná su mes komo un di e plataforma mas importante pa hóben ku ke krese den mundu di beyesa i publisidat, ku sosten di formashon profesional i introdukshon den un ret global.

Pa e promé biaha den historia Boneiru lo forma parti den e sertamen prestigioso aki ku Myangelica Gustowski (17 aña), ku aktualmente ta karga e título Miss Teen Bonaire 2023/2024. Myangelica ta e refleho di un hóben boneriano ku ta inspirá, determiná i prepara pa subi e stage internashonal, na Bogotá, Colombia di 8 pa 15 di yüli 2025.

Duranti e lunanan tras di lomba ya Myangelica a kuminsa ku un trayekto intensivo di preparashon ku ta inkluí

•             Pasarela

•             Public speaking

•             Kreashon di un kampaña personal di inspirashon

•             Desaroyo di imagen i estilo den kolaborashon ku Nory Casti Beauty Spa

Tur e preparashon ta bou di guia profesional di Fundashon BIATA, ku ta dediká pa forma e lidernan pa nos isla

Nos meta ku partisipashon aki ta:

•             Pone Boneiru den un lus positvo riba e mapa internashonal.

•             Mustra kapasidat ku nos ekipo tin pa eduka i forma nos hóbennan

•             Inspirá otro hóbennan di Boneiru pa soña grandi i krea su mes oportunidad.

•             Promové nos kultura i turismo riba mapa mundial

Nos ta konta ku pueblo su sósten

FUENTE: FUNDASHON BIATA/LIVE99FM