INVITASHON SELEBRASHON SIMADAN DI PASTÓ 2025

Kralendijk,- Djaluna Dos Dia di Pasku di Resurekshon dia 21 di aprel 2025 Parokia San Luis Beltran ta selebrá e kustumber Simadan di Pastó. E dia ta kuminsá ku un Santa Eukaristia pa 9or di mainta.

Despues di misa ta kuminsá bende kuminda i diferente kos di kome i bebe. E simadan ta sali 5or di atardi for di Plenchi Nolly Celestijn pariba di misa bai sùit i ta pasa den kayanan di Rincon. Despues di yegada di simadan na misa e selebrashon ta sigui ku presentashon di diferente grupo musikal. Lo tin diferente stènt i aktividatnan.

Pader Baak ta invitá pueblo di Boneiru pa bin selebrá huntu ku parokia di Rincon

Simadan di Pastó 2025. Kuminsando for di mainta ku Santa Eukaristia gradisiendo Dios pa tur kosecha risibí riba tur áreanan di bida, kosecha di kunuku, trabou, familiar i spiritual. I den oranan di atardi kue anochi por bin wapa simadan riba ritmo di nos agrupashonnan musikal.

Pader Baak ta kombidá tur grupo di folklor pa bin engrandesé e simadan den kayanan di Rincon. Gruponan di folklor ku kier partisipá por tuma kontakto ku sra. Dorothy Cicilia na telefòn 7969046. Simadan di Pastó tin komo meta pa rekoudá fondo pa mantenshon di e edifisio di parokia di Rincon i tur ku kier koperá por hasi esaki. Por tuma kontakto ku sra. Dorothy Cicilia, sra. Ada Albertus i sra. Jessie Crestian. E aña aki simadan di Pastó ta dediká na sra. Saluciana Meralda Frans-Frans. Deseando un i tur un bon Pasku di Resurekshon, Hesus Resusitá bendishoná un i tur!

Programa Simadan di Pastó 21 di aprel 2025

09:00or Santa Eukaristia

10:30or Koffiemorgen

12:00or Bendementu di Kuminda

12:00or -17:00 Diferente aktividat

17:00or Parada di Simadan ta sali for di Plenchi Nolly Celestijn pasa den kayanan di Rincon

19:00or Presentashon di Bandanan

23:00or Klousura

FUENTE: PADER ALPHONSUS BAAK/LIVE99FM