AWE MI KE PONE UN SPIL DI REFLEKSHON SINDIKAL NA BONEIRU.

Kralendijk,- No tin duda ku sindikalismo na Boneiru den e último 5 añanan a haña debido atenshon den nos komunidat i tambe pafó di Boneiru.

Sindikalismo a logra gana e rèspèt i rekonosimentu den tantu e sektor gubernamental lokal komo na Den Haag i tambe den e sektor empresarial. Den komunidat mes nos por tuma nota di mas konsiensia di e trahadó pa ku e balor di sindikalismo. E logro éksitoso aki sigur ta resultado di un profilashon positivo di USIBO, lantá for di 2012 i ku ta un partisipante kompleto den e plataforma tripartit kual ta Diálogo Sentral huntu ku sektor gubernamental i empresarial. Un plataforma ku rekonosimentu di gobièrnu lokal, di tur ministerionan na Ulanda, pero tambe di institutonan ku ta yuda den formulá maneho na bienestar di e pueblo en general i e interesnan en partikular di e sektor laboral i esnan mas vunerabel den nos komunidat.

Un plataforma ku a prueba di logra resultadonan konkreto riba e aspekto sosial, miéntras ku ta sigui duna su aporte pa un kresementu ekonómiko duradero pa karga un komunidat husto. E desaroyo positivo di e sindjkato AFBW kargá pa lidernan ku riba un base boluntario pero komprometé ta duna tur loke nan tin na eksperensha i konosementu pa sigui karga sindikalismo sigur a kontribui na e imahen positivo di sindikalismo.

Pero tin un realidat ku nos mester enfrentá i esei ta enbehesimentu di liderato. Esaki ta krea e nesesidat pa relevo di liderato pa un generashon mas hóben. I ta bon pa kada sindikato na Boneiru hasi un análisis interno riba esaki. E promé eksigensia di analisis ta pa e sindikato evaluá ku e ta kumpli ku su statutonan. E kumplimentu aki básikamente ta enserá ku anualmente e direktiva ta duna relato di aktividatnan ku ela desplegá den e aña ku a transkuri, e ta duna relato i responsabilisá su maneho finansiero ku ela hiba i e ta tene reunionan statutario ku su direktiva, su shòpstewardnan i su miembresia. Importante ta tambe ku e ta tene elekshon statutario pa skohe direktiva nobo pa kada temporada stipulá den su statuto.

E pregunta ta ki strategia ta usa pa enfrentá e fenómeno di enbehesimentu aki. Na mi humilde opinion e reakshon riba e fenómeno aki ta formashon di liderato nobo. Ta e manera pa traha riba kontinuidat i krea relevo den sindikalismo. Ta di spera ku sindikatonan na Boneiru uni nan mes den USIBO i konhuntamente traha riba un programa di mas aña di formashon riba nibvel básiko, nivel mediano i tambe riba nivel di direktiva. Banda di esaki lo ta bon tambe pa traha riba sierto spesialismo den sindikato, manera por ehèmpel kurso pa negoshadó di CAO i kurso pa krea mas konosimentu riba nos leinan laboral i kon nos ekonomia i merkado laboral ta hinká den otro. Pa logra esaki mester tin lidernan ku ta komprondé ku nan funshon den sindikato no ta pa semper i ku ta parti di nan deber ta pa krea espasio pa relevo. Ta insólito ku ainda tin sindikato ku no ta kumpli ku nan statutonan. I bo ta rekonosé esei tambe ya ku e sindikatonan ei ta suak, nan no ta profilá i nan a keda pegá den tempu i no ta kana ku e desaroyo sosial-ekonómiko ku Boneiru ta pasando aden.

Dia di labor ta e dia ku ta konmemorá e logro- i luchanan sindikal pa entre otro salario husto, kondishonnan laboral sigur i derechonan laboral. Tur esaki pa mehorá kalidat di bida di e trahadó i su famia. Lo ta bon tambe pa banda di rekordá e lucha i logronan históriko aki, sindikalismo riba e dia aki pone atenshon tambe riba sakrifisionan di awendia ku ainda nos mester pasa aden pa duna e klase trahadó e lugá ku e meresé den komunidat. Antó e sakrifisionan aki hopi biaha ta trahadó komun i koriente mester a hasi pa logra un meta mas haltu.

Den e temporada tras di lomba tin testimonio bibu di trahadónan ku a kibra e kadena di miedu, ku a surpasá e spiritu di intimidashon i menasa i a sali dilanti pa su derecho i esun di su koleganan. Tin testimonio bibu ku e trahadónan aki a sufri e konsekuensia mas haltu pa su lucha, esta keda retirá for di trabou, a kita pan for di nan boka i for di boka di nan famia.

Na e otro un banda e posishon heroiko aki a kondusi ku koleganan di trabou a realisá ku ta den UNION so nan lo tin defensa i ta den union so por logra para abuso i eksplotashon riba flur di trabou. Nan sakrifisio a trese kuné ku trahadónan a uni nan mes den sindikato i awe nan ta gosa di protekshon kontra dunadó di trabou di mala fe. Nan ta eksperenshá trato igual riba flur i kolektivamente tin akuerdo será ku a mehorá no solamente nan kondishonnan primario, manera salario, pero tambe a mehorá nan sirkumstansianan laboral.

Awe kumpliendo ku nan debernan nan sa ku tin rèspèt i rekonoisimentu pa nan i nan ta risibi un pago hustu pa e labor ku nan ta presta. Mi ta kere ku sindikalismo lo hasi bon pa konsiderá den kuadro di selebrashon di Dia di Labor pa entrodusí un rekonosimentu tambe pa trahadónan ku a sirbi den e tempu aki komo ehèmpel di a kibra e kadena di miedu i a surpasá e spiritu di menasa i intimidashon pa logra derecho pa e trahadó. Mester pone e trahadónan aki riba e mesun liña i laga nan sirbi komo ehèmpel, meskos ku Tula i otro lidernan sindikal ku a hasi sakrifisionan pa awe e klase trahadó por reklamá su derechonan. Nan meresénan forma parti di e historia sindikal di Boneiru.

FUENTE: NÒCHI WILLEM/LIVE99FM