HOPI LO A PUNTRA TA KIKU MIEMBRONAN DI KONSEHO INSULAR DI BONEIRU TA HASIENDO ANTO.  

Kralendijk,- Un moshon na man di e miembro di konseho insular sr. Cyrill Vrolijk, a keda adoptá pa kolmo unánimamente.

E moshon ku ta boga pa ekstenshon di e Lei di Kontribushon di Enseñansa i Kompensashon di Gastunan di Skol (WTOS) pa Boneiru, ta parse na promé bista un stap den direkshon di igualdat entre Hulanda Karibense i Hulanda Oropeo. Sin embargo, si tira un bista mas di aserka, ehekushon di e moshon aki por kondusí na un bahada drástiko den e sosten ku ta duna studiantenan na Boneiru. Esaki ta pasobra e definishon aktual di “artíkulonan di skol” na Boneiru ta mas amplio ku e kobertura ku WTOS ta duna na Hulanda Oropeo.

Na Boneiru, artíkulonan di skol no ta enserá solamente buki i material di enseñansa, pero tambe artíkulonan esensial manera unifòrm di skol, sapatu, gastunan di transporte i otro artíkulonan práktiko nesesario pa partisipashon di skol.

E servisio Karibe Hulandes (RCN) i e Unidat di Asuntunan Sosial i Empleo (SZW) aktualmente ta ofresé ònderstant ku ta adaptá na e situashon sosio-ekonómiko spesífiko di e islanan, kaminda pobresa ta relativamente mas haltu ku na Hulanda Oropeo.

WTOS ta proveé ​​un kontribushon relashoná ku entrada pa alumnonan riba edat di 18 aña, pero esaki ta dirigí prinsipalmente na e gastunan di buki, transpòrt di bùs i trein i gastunan di skol.

Uniform i otro gastunan relashoná ku skol por lo general ta kai pafó di e ámbito di e lei aki. Ademas, e WTOS no ta adaptá na e sirkunstansianan ekonómiko i geográfiko úniko di Hulanda Karibense.

Dor di deklará e WTOS aplikabel pa Boneiru, tin riesgo ku e sosten aktual, ku ta mas amplio, lo wòrdu remplasá pa unu mas limitá.

Esaki lo nifiká ku studiantenan lo no risibí supsidio mas pa gastunan esensial manera unifòrm, tas i rugtas di skol, transporte, hèrmèntnan digital i kalkuladónan spesial, entre otro, loke por stroba seriamente akseso na edukashon pa yunan di famianan ménos prudiente.

E situashon sosio-ekonómiko na Boneiru ta rekerí un aserkamentu na midí. Un areglo standart manera e WTOS no ta tene kuenta ku e retonan spesífiko riba e islanan, manera gastunan di bida mas haltu i disponibilidat limitá di material di skol segunda mano.

Esaki por kondusí na un situashon kaminda e sosten no ta kumpli ku e nesesidatnan real di e studiantenan.

Ounke e moshon di Cyrill Vrolijk tabata motivá pa un intenshon noble i kisas populista di kombatí desigualdat, su ehekushon por tin konsekuensianan negativo no intenshoná pa studiantenan na Boneiru.

E sosten aktual ta kubri mas ku djis e gastunan di buki i material di enseñansa, i remplasá esaki ku e areglo di WTOS ku ta mas limitá lo ta un paso grandi atras.

Ta asumí ku e diputado di enseñansa tabata presente durante e presentashon di e moshon aki pero aparentemente i te asina leu ku nos sa, e no a duna un opinion riba e moshon aki.

Esaki ta lanta pregunta riba e nivel di envolvimentu i e konsiderashonnan di kolegio ehekutivo pa loke ta trata e posibel konsekuensianan di e diktum di e moshon.

Ta esensial pa tene kuenta ku e konteksto spesífiko i nesesidatnan di Boneiru ora di implementá òf proponé medidanan di maneho nobo.

Mirando e echo ku tur miembro presente di konseho insular tambe a bai di akuerdo ku e moshon, ta parse ku nan tampoko no tin niun tiki idea di e implikashonnan real pa loke ta trata e moshon i e ròl di diferensáshon den lei i regla.

FUENTE: WILLEM A. CECILIA/LIVE99FM