Kralendijk,- Despues di e komoshon tokante e biahenan frekuente di e miembronan di konseho insular, ta importante pa analisá e biahenan aki di forma krítiko a base di e informashon disponibel i relatonan di biahe.
Meta ta pa determiná te ki grado e biahenan aki ta kontribuí na e ròl di supervishon, traha kuadro i representashon di konseho insular, i si e ophetivonan di e biahenan menshoná por a wòrdu alkansá na un manera mas efektivo i efisiente. E análisis aki ta inkluí e biahe di trabou pa Hulanda di 4 pa 13 di desèmber 2024 i e biahe di trabou den yanüari 2025.
Meta di e biahenan tabata pa kompartí konosementu entre otro un enkuesta di konseho insular ku mester tuma lugá, prosesonan demokrátiko, nètworking, inkluyendo reunionnan ku stipuladónan di maneho, partnershipnan, inkluyendo preparashon pa e kumbre di BES i diskushonnan ku e Konseho di Estado. Meta di e biahe na yanüari tabata pa partisipá den enkuentronan importante, fortalesé koperashon entre Boneiru i Hulanda i asistí na un evento spesial pa sostené partisipashon i desaroyo pa ku maneho pa hóbennan.
E ophetivonan di e biahenan aki en prinsipio por kontribuí na e tarea representativo di konseho insular i posiblemente tambe na e tarea di traha kuadro. E pregunta ta keda sinembargo si e resultadonan konkreto di e biahenan aki ta hustifiká e gastunan i e ousensia di e miembronan di konseho insular for di Boneiru.
Mas aleu e biahenan ta lanta e pregunta si nan ta kai den e tareanan núkleo di konseho insular i si esaki ta e manera mas efisiente i efektivo pa promové interesnan di Boneiru.
Pa loke ta trata e ròl di supervishon, òf por bisa tambe e ròl di kontroladó di konseho insular mester puntra si e biahenan aki ta kontribuí na e funshon di supervishon aki.
Al fin i al kabo, tabata tin algun aspekto pa loke ta trata supervishon konkreto di kolegio ehekutivo durante e biahenan? Un pregunta legítimo. Lo traha rapòrtnan konkreto pa loke ta trata e resultadonan di e biahenan aki relashoná ku e maneho di kolegio ehekutivo? Pa loke ta trata e ròl di traha kuadro di maneho, mester puntra si Hulanda efektivamente ta trahando riba un desaroyo di maneho ku tin un impakto direkto riba Boneiru.
E diskushonnan ku stipuladónan di maneho na Hulanda ta struktural i nan ta kondusí na proposishonnan di maneho konkreto ku ta wòrdu implementá na Boneiru?
Ta un otro pregunta legítimo. Ken ta e ta stipuladónan di maneho hulandes i dikon kolegio ehekutivo no ta enbolbí?
Konseho Insular ta representá e pueblo di Boneiru i ta sali pa su interesnan. Asistiendo na eventonan y diskushonnan ku outoridatnan hulandés por kai bou di e tarea aki, basta ku por demostrá ku e ta benefisiá e pueblo di Boneiru.
E pregunta ta keda si komunidat di Boneiru ta enbolbí sufisientemente den esaki i si enbèrdat e biahenan aki ta resultá den mehorashonnan konkreto pa e habitantenan di Boneiru. Nos no sa esaki.
E miembronan di konseho insular ta biaha pa Hulanda tur aña pa entre otro bishitá e kongreso di e asosashon di e munisipionan di Hulanda.
E balor agregá di biahenan èkstra mester wòrdu balansá kontra e gastunan i benefisionan. Aki tambe por hasi preguntanan manera si ta informá komunidat na un manera transparente tokante e gasto di e biahenan aki i e resultadonan konkreto ku ta sali for di tur esaki. I te ki grado a konsiderá métodonan alternativo, manera reunionnan digital, relatonan òf momentunan di konsulta lokal ku e servisio lokal di Hulanda Karibense (RCN), ku ta proveé un alternativa mas efisiente i kosto-efektivo?
Tin krítika ku e miembronan di konseho insular ta “sinta riba stul di kolegio ehekutivo”, loke ta indiká un posibel sobrepasamentu di nan ròl. Konseho insular mester formulá i vigilá maneho, pero no tuma akshon ehekutivo direkto.
E persepshon ku miembronan di konseho insular ta neglishá nan tareanan primordial dor di biaha muchu frekuente por mina e konfiansa di e poblashon den gobièrnu.
A base di e análisis, ta dudoso si e biahenan ta kuadra kompletamente ku e tareanan núkleo di konseho insular. Ounke e biahenan ta kontené elementonan ku ta kai dentro e tarea representativo, e ta lanta preguntanan tokante nan efektividat i efisiensia.
E tareanan di supervishon i traha kuadro no ta parse di ta keda fortalesé signifikantemente dor di e biahenan aki. Ta falta un splikashon i responsabilidat kla pa loke ta trata resultadonan konkreto ku e biahenan aki lo nifiká pa e pueblo di Boneiru. E frekuensia i gastunan di e biahenan aki mester ta mas transparentemente i proporshonal na e benefisionan real pa Boneiru.
Konklushon ta ku e tarea di kontrolá, traha maneho i representashon di parti di konseho insular mester keda mas mará na akshonnan konkreto pa loke ta trata e biahenan. E tarea di traha kuadro ta wòrdu kargá parsialmente dor di e biahenan, i no ta kla kon e konosementu optené ta wòrdu tradusí den maneho. E ròl representativo ta parsialmente evidente, pero sin resultadonan direktamente i palpabel pa e komunidat boneriano.
Un parti pa mehorashon lo ta pa establesé un hustifikashon i evaluashon mas kla manera ki medidanan konkreto di maneho lo resultá di e biahenan aki. Kua di esakinan ta mesora aplikabel pa Boneiru i kon lo informá e komunidat tokante e resultadonan di e biahenan aki? Mester menshoná un fecha di un reunion públiko di konseho insular kaminda ta transformá e metanan di e biahenan den un maneho ku mesora ta aplikabel.
Sin esaki e efektividat i efisiensia di e biahenan di konseho insular ta keda kuestionabel i sigur por wòrdu klasifiká komo biahenan di plaser.
FUENTE: DR. WILLEM CECILIA/LIVE99FM

GIPHY App Key not set. Please check settings