KOLABORASHON DI PARTI ABVO-BONEIRU NA AKTIVIDATNAN I EVENTONAN SOSIAL/KULTURAL I DEPORTIVO NA BONEIRU

Kralendijk,- Rumbo pa selebrashon di 90 aña di fundashon di Sindikato ABVO otro aña,   ABVO-Boneiru a disidí pa di un forma adekuá, kolaborá na funshonamentu di organisashonnan enkargá ku eventonan magno riba tereno sosial/kultural  den  nos komunidat.

E filosofía aki, ta basá riba e hecho ku gran parti di miembronan di ABVO-Bonieru, di un òf otro forma ta relashoná ku Karnaval. Esaki sea pa medio di    nan funshon na e diferente servisionan, komo partispante den gruponan,      komo músiko, komo operadó di un stènt pa bende kuminda,  òf komo parti di       e   públiko grandi karanavalista.

ABVO-Boneiru a skohe pa duna kontenido na e kolaborashon aki, pa medio di entre otro, pone e fasilidatnan i infrastruktura di Sede di ABVO-Boneiru na disposishon di “Komishon di Karnaval Union ta hasi Forsa”. 

ABVO-Boneiru i Komishon di Karnaval “Union ta hasi Forsa” a forma un aliansa i a firma un Akuerdo di Kolaborashon.

Ofisina di Komishon di Karnaval lo ta ubiká den nos sede i sierto aktividatnan relashoná ku organisamentu di Karnaval 2025 tambe lo tuma lugá den nos sede i den “Sala di Evento Erik Francisco Tjietjie”.

ABVO-Boneiru ta deseá Komishon di Karnaval “Union ta hasi Forsa”, tur klase di eksito ku organisashon di Karnaval 2025 i uso di nos Sede pa hasi esaki.         “Biba Karnaval di Boneiru 2025”.

FUENTE: ABVO BONEIRU/LIVE99FM