Kralendijk,- Ta konosí ku imigrante- y refugiadonan ku a keda ilegal na Boneiru, ta haña un but ora nan ta sali for di Boneiru via airport.
E but ta basá riba lei. Sin embargo, NO ta obligatorio pa paga e but na airport. Un siudadano semper tin derecho pa pleita su kaso dilanti di Korte promé ku e ta paga su but. Kisas hues por baha e but. Of husga ku den e kaso spesífiko no tin ku paga but ètòl.
Pues bo semper por sali for di Boneiru sin paga e but. Dia bo ta regresá na Boneiru bo ta wòrdu yamá pa presentá na Korte pa pleita bo kaso.
By the way, e but ta konta pa imigrantenan Hulandes Europeo y Antiano di nos otro islanan tambe.
Di imigrantenan nos ta tende ku Marechaussée na Airport ta pone preshon síkiko riba imigrantenan pa paga e but mesora, promé ku nan ta sali. Si e infomashon aki ta korekto, e ora ei Marechaussee ta aktua inkorekto. Asta ilegal.
Pa haña sa kiko ta pasando presis, Fundashon Union di Imigrantenan Boneriano (FUIB) a skirbi un karta na Representante di Reino, Kmar y Ministerio Públiko. Nos a informá e Konseho pa Refugiadonan na Hulanda tambe.
Ariba e but, ta duna e imigrantenan ilegal tambe un prohibishon di dos aña pa drenta Boneiru bèk. Asina nos ta tende di nos fuentenan. Over di esaki nos tambe a pidi aklarashon.
Fundashon ‘Union di Imigrantenan Boneriano’ lo tene pueblo en general y imigrantenan en partikular na altura di e informashon ku nos ta verwagt di risibí di outoridatnan. Nos no ta stimulá ilegalidat, pero migrantenan mayoria biaha ta bini serka nos, pasobra nan no por sobreviví finansieramente den nan propio pais. Venezolanonan, por ehèmpel. Tur hende mester tene su mes na lei, pero e aplikashon di lei mester ta hustu sí.
Tur djasabra di 4’or te 6’or di atardi, Fundashon ‘Union di Imigrantenan Boneriano’ (FUIB) tin un Konsultorio hurídiko grátis na ofisina di abogado Bijkerk na Kaya Jose Gerigorio Hernandez 16A, Antriol. Si kier duna un donashon, nos ta gradisido.
FUENTE: FUIB, ABOG. M. BIJKERK/LIVE99FM

GIPHY App Key not set. Please check settings