‘LUIS MOKA’ RIB’E MURAL MAS NOBO DEN COLORS OF THE CARIBBEAN DI KOOYMAN

KRALENDIJK: Pa kasi 85 aña, Kooyman a dediká su mes na proveé komunidatnan karibense ku hèrmènt-, produktonan i ekspertisio ku nan mester pa konstruí, krea, embeyesé i prosperá.

Un di e metanan ta, pa kontribuí na nos komunidat dor di duna un man na proyektonan ku un impakto positivo riba Hubentut, Enseñansa, i Sostenibilidat. Kooyman a bin ta sostené vishon di artistanan lokal ku Colors of the Caribbean, i ta bolbe ekstendé esaki den un kampaña ku ta kubri tur 5 isla. E biaha aki komo parti di e selebrashon di 85 aña. Un kampaña multikultural i hopi kolorido ku ta selebrá tur loke ta uni nos komunidat, poniendo énfasis riba arte, kultura, kreashonnan úniko i vivensia di nos isla.

Sinku artista talentoso di nos islanan; Kòrsou, Boneiru, Aruba, St. Maarten i Barbados a krea kada un, un mural ku ta representá e “Kolónan di Karibe” i ta duna bida na esensia di nan isla. E aña aki a buska spesífikamente organisashonnan sin fin di lukro, manera skolnan i sentronan deportivo, pa duna bèk na komunidat dor di krea un mural.  

Kooyman a sostené e vishon di kada artista ku e lokalidatnan p’e mural ideal riba nan isla i a suministránan e pintura, ku nan tabatin mester pa hasi e trabou. Di e manera aki, Kooyman ke inspirá komunidat pa agregá koló na nan mundu. Kooyman tin tur tipo di fèrf pa agregá koló na bo estilo di bida; sintibo inspirá pa kambia e koló di kas, ofisina, área di ehersisio, patio i mas. Kooyman ta felisitá e artistanan ku nan mural i pa hasi e kampaña aki unu realmente impaktante. Pa Boneiru tabata Loes Hak di Aloha Bonaire, ku e mural yamá ‘LUIS MOKA’. Jong Bonaire tabata e sentro di rekreashon pa komunidat ku suerte pa risibí un mural e aña aki.

LUIS MOKA-  Loes Hak

Riba imágen athunto, un obra kolorido i balapena pa mira di serka. Loes a krea ‘LUIS MOKA’ inspirá riba kultura, e talento di e kantante i tur loke e hóben Boneriano ta representá p’e kultura Boneriano i su músika. Luis Moka ta un ehèmpel pa hubentut Boneriano. Kooyman ta invitábo pa bishitá e proyekto bunita aki na Jong Bonaire. Pa mas informashon, bishitá  e ‘paint hub’ na www.kooymanbv.com òf Kooyman su página di Facebook i Instagram.

FUENTE:KOOYMAN/LIVE99FM