FRAKSHON DI UPB KU KARTA KU PREGUNTA A BASE DI ART. 46 RDO  NA SEÑOR SOLIANO I MIEMBRONAN DI KOLEGIO EHEKUTIVO.

Kralendijk, – Konseho Insular di Entidat Públiko Bonaire i mas en partikular frakshon di UPB, ku asombro kresiente a tuma nota di e echo ku Bonaire Holding Maatschappij NV (luego ‘BHM’) siendo e úniko akshonista di Selibon NV a terminá e “Overeenkomst Van Opdracht” ku e ehekutivo konforme statuto di Selibon NV i na su lugá a nombra un gerensia ku ta konsistí di un persona, ku aparentemente no tin eksperensia ku “wastemanagement” esta maneho di shushi. Esaki seriamente ta preokupá nos frakshon, pasobra saliendo for di echo i sirkunstansia mas i mas ta resaltá ku maneho di BHM i Kolegio Ehekutivo aparentemente no ta transparente. 

E miembro nobo di Hunta di Komisario ku nèt algun luna pasa a asumí e funshon i e direktor interino ku a nombra resientemente, tambe direktor di BHM no tin ni konosementu ni eksperensia riba e tereno di “waste management”. Komo frakshon primeramente no tin duda al respekto den kapasidat di e tres (3) diferente órganonan menshoná riba  terenonan di abilidat pa manehá, pero pa loke ta trata  maneho di shushi (wastemanagement), konosementu  di e kontenido, e maneho di maneho di produkto residual i e aspektonan tékniko mará na esaki, no por ripará esaki serka niun miembro di e órganonan. 

Den e kuadro aki frakshon di Union Patriotico Boneriano den konseho Insular di Entidat Públiko Bonaire a base di artíkulo 46 Reglamento di Ordu (RdO) ta dirigí e siguiente preguntanan na Gezaghèber i Kolegio Ehekutivo.

1. Dikon Gezaghèber te ku awe no a kontestá karta fechá  19 di aprel 2024 di frakshon di UPB den konseho Insular? Ta trata un karta ekstenso ku 26 pregunta dirigí na Gezaghèber konforme artikulo 159.1 WolBES tokante e situashon den i rondó di Selibon NV. 

2. E término pa kontestá e karta menshoná ya pa tempu largu a ekspirá. Un petishon pa e prolongashon pa pidi mas tempu tampoko nos no a risibí di Gezaghèber. Dentro di ki tempu Konseho Insular por risibí un kontesta por eskrito riba e karta menshoná?

3. BHM tin disponibel un skema kon e organisashon ta hinká den otro ku menshon di tur kompania filial ku ta bou di su maneho? Si ta si, nos frakshon ke risibí un ehemplar di esaki.

4. Ki ta papel di Sekshon “Deelnemingen”?

5. BHM ta e úniko akshonista di e kompanianan filial. Nos a komprondé ku BHM tin un akuerdo di maneho ku su kompanianan filial . Ta kuadra ku mensualmente e kompanianan filial aki ta paga BHM un kontribushon pa servisio di sosten ku BHM lo mester ofresé?   

6. Di ki manera (den porsentahe) BHM ta kubrí akshonnan den Selibon NV? 

7. Si akaso e akshonnan no ta kubrí ki ta e motibu (nan) pa esaki?

8. Ki ta e  situashon pa loke ta trata aprobashon di kuentanan anual di BHM i su kompanianan filial?

9. Riba 22 di aprel 2024 a tuma lugá un reunion entre direktor di BHM i direktor di Selibon NV. E dia siguiente tabatin riba media sosial publiká ku direktor di Selibon lo a haña retiru. Kolegio Ehekutivo lo a duna pèrmit na sierto instansia pa públikamente bergonsá direktor di Selibon NV na un manera ku ta tacha onor i nòmber di hende?   

10. Si akaso e kontesta riba pregunta 9 ta afirmativo, por splika nos kua ta base di e pensamentu i e ehekushon pa yega na e desaroyo aki? 

11. Tabatin un proseso pa skucha tur partido promé ku di parti di Kolegio Ehekutivo disidí pa otorgá BHM derecho di voto pa retirá ehekutivonan konforme statuto di Selibon NV?

12. Tabatin un prosedimentu di solisitut i reklutashon transparente konforme stipulashon den Code Good Corporate Governance i Prinsipio di Bon Gobernashon pa asina reklutá un direktor nobo pa Selibon NV ?

13. Si kontesta riba pregunta 12 ta afirmativo, e aktual Hunta di komisario tabata embolbí pa a nombra  ehekutivo nobo den Selibon konforme eksigensianan preskribí den statuto di Selibon NV ?

14. No ta tarea di Hunta di komisario pa pèrkurá pa  reklutashon, dunamentu di konseho i postulashon di ehekutivonan nobo na akshonista di Selibon NV ? Si ta nò? Serka ken sí?

15. For di ki tempu a alsa tarifa di impuesto riba shushi, ordenansa di retribushon, di “leges” (Eilandverordening Afvalstoffen van 30 desèmber 2010) i a aktualisa/adapta e kontrato di kuido?

16. Ki ta punto di bista di Kolegio Ehekutivo tokante tarifa pa impuesto riba shushi?

17. Ki ta e situashon pa loke ta konserní sifranan anual di e kompanianan filial di BHM?

Pa motibu di interes i urgensia di e situashon aki den un di e kompanianan anónimo mas esensial di atministrashon di Bonaire, ta pidi enkaresidamente, pero insistente pa kontestá Konseho Insular den Reunion di Forma opinion riba 20 ougùstùs 2024 e preguntanan ariba menshoná.

Atentamente

Frakshon UPB,

Benito R. Dirksz i Simeona B. Chirino-Felida   

                

FUENTE: FRAKSHON UPB/LIVE99FM