Redakshon
Kralendijk, – Entre aprel i yüni 2024 a konstatá oumentonan supstansial den kategoria di produktonan esensial, segun e asina yamá lista di produktonan básiko. Den kategoria di karni i piská e preisnan a subi den mei ku 27% i den yüni ku 17%. Pa loke ta bèrdura i fruta e oumento tabata 15% den mei i un bahada di 5% den yüni. Artíkulonan pa beibi a subi ku 6% den mei i 3% den yüni. “E oumentonan aki ta afektá speshalmente kasnan di famia vulnerabel i siudadanonan ku un entrada limitá”. E oumento kontinuo di gastunan aki ta suprayá e nesesidat pa medidanan pa protehá e forsa di kompra i mantené produktonan básiko pagabel.
Sindikalismo ta kompartí totalmente e preokupashonnan aki i ta lamentá ku nos gobièrnu i nos representantenan den Konseho Insular aparentemente no ta karga e preokupashonnan aki. A lo ménos komunidat no ta mira den un forma konkreto kua medidanan a òf lo tuma pa protehá e forsa di kompra ku a keda lográ ku hopi lucha i perseveransha durante 14 aña largu i ku hasta mester a subi kaya dos biaha pa a drecha e entradanan di esnan mas vulnerabel den nos komunidat i drecha e sueldo mínimo di e trahadónan. I e tragedia di esaki ta ku atrobe ta esnan vulnerabel i ku entrada limitá ta bolbe haña e sla.
For di 16 di aprel 2021 den e akuerdo di Kralendijk, di kual gobièrnu di Boneiru tambe a tuma parti a mustra ku bahamentu di gastu pa siudadanonan i kompanianan ta esenshal. A splika ku esaki no ta un maneho di sosten parotin pero un kondishon fuerte i duru pa por oumentá e parti mas abou di e kas di entrada i ku ta kuadra ku e filosofía di yega na un balansa hustu di entrada i gastunan. Den e akuerdo di gobernashon ku a firma ku Ulanda tambe ta duna atenshon na e aspekto di baha gastu aki, miéntras ku den e akuerdo di e aktual gobernashon di Boneiru tin un kapítulo kompleto dediká na loke na a yama un komunidat husto.
Ta bin aserka ku for di òktober 2023 ora a bira konosí ku lo bai oumentá supstanshalmente e mínimo sosial i kuné e sueldo mínimo i e penshun di behes sindikalismo pero tambe UNKOBON a spièrta gobièrnu pa ta alerta pa loke ta desaroyonan negativo den preis aki na Boneiru i speshalmente den preisnan di produktonan for di e lista básiko. I ta di lamentá ku awe nos mester konstatá ku tur e esfuersonan, tur e sakrifisionan pa a drecha e banda vulnerabel den nos komunidat pa loke ta entrada ta bou di menasa serio di bai perdí pa negligensha di nos gobièrnu i tambe pa un falta total di atenshon pa e tema di parti di nos Konseho Insular, kendenan ta nos representantenan legal. Mester bin un paro den esaki.
Komunidat ta sklamando pa un gobernashon ku ta aktua i no un gobernashon ku pa 90% ta basá riba teknokrasia, esta basá riba traha plan tras di lèsenar, pasobra miéntras ekspertonan ta traha plan i ta kalkulá entrada i gastu di kada plan, aki for ta tumando lugá desaroyonan ku no ta na bienestar di e pueblo. Nos kier mira ku luho i detaye pakiko preisnan ta subi asina drásiko, esta ku 27%. Ta kiko ta kousa esaki, ta kos ku nos por solushoná i si ta asina pakiko no ta aktua. Gobièrnu a sinta ku importadónan pa asina laga hasi un investigashon riba e desaroyo negativo aki i kiko tabata e resultado??
Ta for di òktober aña pasá a spièrta gobièrnu pa e desaroyo negativo aki. Entre tantu a pasa 10 luna. Duna pueblo un update di e siguiente medidanan akordá den Akuerdo di Kralendijk i ku por sierto diputado Nina Den Heyer a forma parti integral di dje.
Nan ta:
1.Kompromiso pa hasi e kompanianan di gobièrnu atministrativamente i finansiero-ekonómikamente salú a base di un análisis di nan struktura di kosto.;
2 ampliashon di e aktual areglo di supsidio di hür pa sektor privá;
3 un kòntròl rigoroso riba maneho di preis i banda di esaki rekonsiderashon pa stipulá preis máksimo pa e produktonan den e makuto básiko i tambe remplasá produktonan no saludabel pa esnan saludabel;
4 entrodukshon di transporte públiko ku ta jùist di importansia pa esnan ku entrada abou;
5 maneho di pobresa i maneho di sanemaentu di debe. Si tuma e medidanan aki tin tur seguridat ku e pueblo ta bai sinti esaki den su saku den un forma positivo.
GIPHY App Key not set. Please check settings