ANUNSIO DI KAMBIO DI GERENSIA NA SELIBON N.V.

Kralendijk, – Entrante 23 di yüli 2024 señor Edsel Winklaar a keda nombrá komo direktor nobo na Selibon N.V. riba un base interino. Edsel Winklaar ta susesor di señor Rudsel Leito ku durante e último 12 aña tabata direktor di Selibon N.V..

Despues di hopi aña di dedikashon di sr Leito a yega e momentu pa traspasá e liderazgo. Su susesor ta un direktor ekpserensiá riba tereno di kompania di gobièrnu na Boneiru i e tin konosementu di atministrashon públiko i di nos komunidat boneriano. Señor Winklaar tin entre otro mas ku 30 aña di eksperensia den organisashonnan ‘profit’ i ‘non profit’, i e tabata enbolbí ku konseho stratégiko riba proyektonan grandi, análisis di organisashon i maneho di kambio.

Den pasado el a traha entre otro komo hefe di departamento di realisashon na Direktorado di Planifikashon i Desaroyo, komo mènedjer di e unidat komersial di WEB N.V. i komo direktor general di Telbo N.V. Banda di esaki el a desempeñá funshonnan tambe komo diputado i miembro di Konseho Insular di Boneiru. Den señor Winklaar nos ta mira un aktitut ku enfoke riba resultado, pero prinsipalmente ku enfoke riba hende i ku kaminda ta nesesario sa kon pa traha brùg. Nos ta pensa ku e por duna un aporte na solushon di e hopi desafionan ku Selibon N.V. ta konfrontá.

E ta un estrategia ku konosementu i forsa di ehekushon ku den un forma eksitoso por duna guia na kambio. Tur esaki ku e meta pa mantené Boneiru limpi i habitabel, i pa duna un aporte positivo na konservashon di medio ambiente i naturalesa. Na nòmber di Hunta di Komisario di Selibon N.V.

FUENTE: SELIBON/LIVE99FM