in

DI AKUERDO KU NORWIN “NÒCHI WILLEM 10-10-10 ANTIA ULANDES KOMO UN UNIDAT ESTATAL A STÒP DI EKSISTÍ.

Kralendijk, – Ta un realidat ku nos mester biba kuné. Tur loke tabata tin un karakter riba nivel antiano a stòp di eksistí. Gobièrnu Antiano konsistiendo di 5 isla a stòp di eksistí; Parlamentu Antiano di 5 isla a stòp di eksistí. NAVU, federashon di futbòl antiano a stòp di eksistí. Mayoria organisashonnan i/o institutonan riba nivel Antiano tambe a stòp di eksistí. Ku desaparishon di gobièrnu Antiano, tambe a stòp di eksistí e kuerpo di empleadonan  públiko Antiano i nan a pasa pa RCN, ku ta Rijks Caribisch Nederland, ku ta un aparato ku a bai kai direktamente bou di Ministerio di Asuntunan Interno. Pa loke ta nivel Insular tambe e loke tabata yama teritorio insular Boneiru, Saba i Statia a stòp di eksistí i a bira Entidatnan Públiko Boneiru, Saba i Statia.

E relashon estatal desde 10-10-10 entre e islanan ku Willemstad a stòp di eksistí i a bira un relashon direktamente ku Den Haag Ulanda. E legislashonnan tambe a kambia. Bou di Antia Boneiru, Saba i Statia tabata kai bou di Areglo di Estado(Staatsregeling) i Areglo di Isla(eilandenregeling). Desde 10-10-10 Boneiru ta kai bou di konstitushon Ulandes(grondwet), miéntras ku riba nivel di entidat públiko, Boneiru ta kai bou di Lei Entidat Públiko(Wet Openbaar Lichaam BES). Otro lei- i reglanan ku tabata eksistí den Antia tambe poko poko a transformá i lo sigui transformá den leinan Ulandes bou di e prinsipio “Comply or Explain”. Esaki ta motibu super bálido pa sindikalismo na Boneiru ta pará riba su propio pia i no por ta dirigí for di Kòrsou mas.

Doktor Moises Frumencio Da Costa Gomez, fundador di e sindikato ABVO semper a guia e pueblo entre otro riba dos prinsipio fundamental, nan ta:

  1. No hasi ku otro loke bo no ke pa otro hasi kubo i
  2. Sosteniendo riba propio forsa, pero ku boluntat pa asistí otro i duna otro un man

Un ta prinsipio bíbliko i e otro ta un polítiko, pero tur dos tin un fundeshi fuerte, esta AMOR PA PRÓHIMO. I sindikalismo su fundeshi ta amor pa próhimo den e mas amplio sentido di palabra. 1 di yüli 1863 mundu a siña Ulanda i nos pa no hasi ku otro loke bo no ke pa hasi kubo, esei tabata stòp ku sklabitut kaminda hende ta doño riba e otro.

15 dezèmber 1954 a siña nos ku nos mester por para riba nos propio pia, pero ku e boluntat pa asistí i duna otro un man. I 10-10-10 a siña nos e realidat ku mi a deskribí ariba, esta ku nos a stòp di eksistí komo un pais.

Den RCN i OLB tin sigur riba 500 empleado/trahadó riba tur nivel, esta di LBO te ku VWO. Pues no tin ningun motibu bálido ku for di mas di e 500 hendenan ei no por saka un kantidat di hende ku kalidat, amor, pashon i dedikashon pa dirigí nan propio sindikato. Mirando e realidat di e desaroyo soshal-ekonómiko, e relashon direkto ku Ulanda i e legislashon otro i moderno entre otro riba tereno laboral un sindikato den sektor públiko ademas afiliá na USIBO den solidaridat mester por funshoná independiente, pará riba su propio pia.

Koperashon a base di rèspèt mutuo ta keda vigente i hasta riba temanan ku ta di interes komun nos tin e deber di asistí i sostené otro. A yega ora pa trahadónan i liderato sindikal na Boneiru mira e realidat sunú manera e ta i kuminsá e proseso di outo dirigí sindikalismo aki riba nos isla. E último añanan nos di e klase trahadó a eksperenshá di aserka ku ta aki e desaroyo ta, ta aki e problemanan laboral ta, ta aki nos mester buska e solushonnan, ta aki nos mester dialogá ku otro pa fiha huntu e rumbo, ta aki e bos di e trahadó mester zona duru i fuerte. Nos no por atendé interesnan di e klase trahadó i su famia via telefòn, whatsapp òf dependé ora tin buelo disponibel, òf ora tin tempu pa atendé nos asuntunan. No por trata trahadónan na Boneiru komo yu di afó i di ménos importansia i sigur no ora ku na Kòrsou sindikatonan nan mannan ta yen ku nan propio problemanan laboral. E susesonan ku a pasa fin di siman un biaha mas solamente a konfirmá loke ta e realidat, esta ku 10-10-10 Antia a stòp di eksistí. Ban biba i aktua den e realidat aki.

FUENTE: USIBO/LIVE99FM

What do you think?

Written by Gian Carlo Maduro

Leave a Reply

Your email address will not be published. Required fields are marked *

GIPHY App Key not set. Please check settings

KOMPENSASHON PA ARTÍKULO DI SKOL, ÜNIFÒRM PA SKOL BÁSIKO I SÈN DI BUKI PA FORMASHON DI MBO PA AÑA ESKOLAR 2024-2025  

1 JULI: REFLEKSHONANDO RIBA ABOLISHON DI SKLABITUT I E TRAJEKTO NOS DILANTI