in

1 JULI: REFLEKSHONANDO RIBA ABOLISHON DI SKLABITUT I E TRAJEKTO NOS DILANTI

Kralendijk, – 1 Juli ta sirbi pa rekorda e kapitulo doloroso di nos historia no konta I pa honra e resiliensa I forsa di nos ansestornan ku a soporta asina tantu. Sin embargo, awe ta surgi preguntanan krusial: E despensa Hulandes tabata sinsero? Kon nan por pidi dispensa mientrastantu nan ta sigui kontrola Boneiru I e otro islanan Antiano sin konsidera reparashon?

Awe 1 Juli 2024, nos pueblo, e desendientenan, ahinda ta permanese kolonisa pa e mesun gobierno Hulandes, I e pueblo ta sigui lucha, aspirando igualdat I hustisia. E despensa hulandes pa e Prome Miniseter Rutte I Rei Willem Alexander ta meramente propaganda. Su proposito ta pa distrai e lidernan Karibenjo ku ta aspirando hustisia reparadora pa e atrosidatnan historiko I kolonialismo su impaktonan duradero. E despensa ta un taktika pa mina e movimento di reparashon di CARICOM na luga di ta un rekonosemento sinsero di errornan di pasado.

E despensa ta hipokresia, ya ku e gobierno Hulandes ta kontinua ku su agenda kolonial despoblando I limpiando etnikamente Boneiru. E poblashon nativo Boneriano a wordu redusi drastikamente di un mayoria na 2010 na menos ku 32% awe na 2024. Unilateralmente, e parlamento Hulandes a inkorpora Boneiru den Konstitushon Hulandes bao di derechonan desigual, sin tene kuenta ku e deseo di e pueblo Boneriano, ku abrumadoramente a rechaza e status aktual ku 66%  votando kontra den e referendum di 18 desember 2015. E akshonan aki a viola derechonan fundamental i sistematikamente ta viola varios instrumentonan legal internashonal, inkluyendo e Karta di Nashonan Uni, e deklarashon di deskolonisashon di Nashonan Uni, I varios tratadonan internashonal di derechonan sivil, politiko,ekonomiko, sosial i kultural.

Awe, nos ta refleha tambe riba e divishon I disolushon di Antias Hulandes riba 10 Oktober 2010. E islanan Korsou, Aruba I Sint Maarten (islanan CAS) a permanese outonomo, operando bao di Statuut ku nan a akorda mutuamente. Nan tin nan mes parlamento, gobierno I prome ministernan ku ta partisipa huntu ku e gobierno Hulandes na Asamblea General di Nashonan Uni. Al kontrario , Boneiru, Sint Eustatius I Saba (islanan BES) a wordu saka I ekslui for di Statuut I a wordu aneksa den konstitushon Hulandes bao derechonan desigual. E islanan BES a wordu duna e status di “entidat publiko territorial”, I no “munisipio spesial” ku ta wordu husa ku frekwensia komo propaganda. Karesiendo di outonomia, nan gobiernonan lokal ta direktamente subordina bao di multiple institushonan no-demokratiko ku ta disidi I ta basa na Den Haag. E situashon aki ta wordu mira komo kontinuashon di kolonialismo, perpetuando aktonan ku Nashonan Uni a deklara kolonialismo komo krimen kontra humanidat.

E gobierno Hulandes no tin niun intenshon di duna reparashon. Komo kontesta riba James Finies su pregunta na e reunion na Oktober 2023 na St Maarten riba e distribushon di e $200 mion priminti pa kompensashon pa  “Pasado di Sklabitut” , ku a resulta I bira masomenos $5 mion pa kada isla keda mantene silensio, e sekretario di estado Van Huffelen a deklara ku e gobierno hulandes lo no konsidera reparashon. Ademas, mientras ku e gobierno hulandes a pidi despensa na su kolonianan Antias Hulandes I Surinam, nan no a pidi despensa na otro teritorionan ku nan a kolonisa I esklavisa manera Guyana (Ingles), ku e hulandesnan a kolonisa pa mas ku 200 anja prome ku a pasa nan pa e Inglesnan solamente un 30 anja prome ku abolishon di sklabitut na Guyana Ingles. Konklushon: E despensa Hulandes pa sklabitut I akshonan similar di propaganda tin komo meta pa purba konserva nan imagen komo un nashon filantropiko ku ta respeta derechonan humano, simbolisa pa e presensia di e Korte Internashonal di Hustisia na Den Haag. Sin embargo e akshonanan aki ta sirbi komo kortina di huma pa desvia e atenshon di BHRO I James Finies su lucha persistente pa konsientisa komunidat internashonal riba e kaso di Boneiru.

Desde Februari 2022, e kampanja a kubri mas ku 600 dia I a logra avansenan den Latino Amerika, den Karibe, na Nashonan Uni New York I na Oropa. A pesar di esfuersonan di gobierno hulandes pa skonde e realidad, e lucha persistente di BHRO I James Finies eksitosomente a logra asentua e kontinou violashonan di derechonan humano, retando e imagen global Hulandes ku nan a fabrika kuidadosamente. E dedikashon kontinou aki ta subraya e importansia di akshon sinsero riba gestionan superfisial den e lucha pa derechonan humano I hustisia, dunando e pueblo Boneriano speransa di un miho futuro konstrui riba prinsipionan di libertat I dignidat pa tur.  

FUENTE:BONAIRE HUMAN RIGHTS ORGANIZATION/LIVE99FM

What do you think?

Written by Gian Carlo Maduro

Leave a Reply

Your email address will not be published. Required fields are marked *

GIPHY App Key not set. Please check settings

DI AKUERDO KU NORWIN “NÒCHI WILLEM 10-10-10 ANTIA ULANDES KOMO UN UNIDAT ESTATAL A STÒP DI EKSISTÍ.

KORSOU: COMPAGNIE IN DE WEST’ DI DEFENSA DEN REGION KARIBE HULANDES TA PASA SU ROTASHON