DELEGASHON DI AFBW A BIAHA PA KÒRSOU PA NEGOSHÁ CAO DI KUIDO BES.

Kralendijk,- Dia 23 Ougùstùs último delegashon di AFBW a biaha pa Kòrsou, pa asina sinta ku otro sindikatonan i e diferente dunadónan di trabou pa por yega na un akuerdo pa un  Kontrato Laboral Kolektivo (CAO).

Ta bai ta un siman di negoshashon huntu ku dunadónan di trabou i sindikatonan di Statia i Saba.  

E proseso di negoshashon pa yega na un CAO, a kuminsá for di tres aña pasa ora a firma e CAO vigente, ku ta yega su final na desèmber di e aña aki.

Sindikatonan i dunadónan di trabou a lanta un tim tékniko pa asina hasi tur preparashon nan pa por yega na un negoshashon hopi efisiente i konstruktivo pa e siman aki.

Lo bai tin diferente punto di negoshashon riba mesa, pero un di e puntonan sigur ku tin mandato fuerte pe, ta e punto di 36 ora di labor pa siman.

Manera tur hende sa kaba, tabata tin asta un manifestashon dor di trahadónan i nan sindikato pa aprobashon pa negoshá esaki i introdusí esaki den e CAO ku tin ku drenta na vigor dia 1 yanüari 2026.

AFBW ta pidi tur trahadó den e sektor di kuido na Boneiru, Saba i Statia pa sigui sostené boso sindikato.

Huntu nos mester uni i ku un bos fuerte i desidido, ku nos tambe tin “derecho riba un mihó trato laboral”.

“DEN UNION TIN FORSA”.

FUENTE: AFBW/LIVE99FM