SINDIKATO ABVO TA PARTISIPANDO NA E KONFERENSIA INTERNASHONAL DI CLAC-WOW NA PORTUGAL

Kralendijk,- For di 7 te ku 10 di òktober 2025, kaminda ta tumando lugá un konferensia i seminario internashonal organisá pa e Kordinadó Latinoamérika di Organisashonnan Mundial di Trahadó (CLAC-WOW).

E evento ta tuma lugá na e pais Portugal, ku ta fungi komo anfitrion pa e aktividatnan importante aki.

Un delegashon di tres miembro di direktiva di Sindikato ABVO ta partisipando ku gran honor na e konferensia i seminario.

ABVO Bonaire i ABVO Curaçao ta representá na e evento, kontribuyendo ku su eksperensia i komprenshon den e ámbitonan di trahadó i sindikalismo.

Na total, 24 pais ta forma parti di e evento, ku ta enfoká riba temanan aktual i desaroyo den mundu di trahadó. Durante e programa, un di e presentashonnan sobresaliente tabata titulá “AI vs Sindikalismo”, un tópiko ku ta stimulá reflekshon i diskushon den e moveshon sindikal.

ABVO ta komprometé pa sigui traha riba e temanan relevante ku a sali for di e konferensia, ku enfoke na inovashon, edukashon i empoderashon di su miembronan.Den esei, nos slogan ta reflehá nos visión: “Code the Future. Train the Mind.”

FUENTE: SINDIKATO ABVO/LIVE99FM