CONCACAF TA BISHITA BONEIRU PA APOYÁ E RE-INISIO DI FUTBOL I FORTALESÉ GOBERNANSA DI FFB

Kralendijk,- Federashon di Futbòl di Boneiru (FFB) a risibí un delegashon di CONCACAF na Boneiru pa un bishita di trabou enfoká riba e situashon aktual di futbòl na e isla, e kondishonnan nesesario pa reanudá futbòl organisá, i e próksimo pasonan pa fortalesé e gobernansa i e struktura institushonal di FFB.

E delegashon di Concacaf tabata konsistí di Howard McIntosh i Sofia Malizia, di e Divishon di Asosiashonnan Miembro di Concacaf. Durante e bishita, CONCACAF i FFB a tene reunion ku diferente stakeholder importante den komunidat di futbòl, i tambe ku representantenan di e klubnan.

E reunionnan a duna stakeholdernan e oportunidat pa kompartí nan punto di bista habrí, identifiká e reto nan ku futbòl na Boneiru ta enfrentá aktualmente, i diskutí pasonan práktiko pa restablesé aktividatnan di futbol di un manera responsabel, sostenibel i bon organisá. E Presidente di FFB a deskribí e reunionnan komo produktivo i konstruktivo.

E diskushonnan a permití ku e diferente stakeholdernan por a ekspresá nan punto di bista i a kontribuí na identifiká un direkshon komun pa futbòl na Boneiru.

E representante nan di Concacaf tabata hopi kontentu ku nan por a reuní ku miembronan di e famia di futbòl na Boneiru i ku nan por a tende direktamente nan prekupashonnan. Despues di e diskushonnan durante e bishita, a desaroyá un plan di akshon pa korto plaso.

E plan ta identifiká medidanan konkreto pa hasi posibel e re-inisio di aktividatnan di futbòl i ta indiká e próksimo pasonan nesesario pa fortalesé e struktura organisashonal i di gobernansa di FFB. E plan di akshon tambe ta establesé un ruta pa restablesé un struktura di gobernansa stabíl, ku tin komo meta pa tene elekshon nobo di FFB no mas lat ku febrüari 2027.

FFB ta rekonosé su responsabilidat pa hiba e proseso aki dilanti i ku progreso signifikativo lo rekerí koperashon, kompromiso i konfiansa entre tur stakeholder. E Federashon ta duna balor na e sosten i guia kontinuo di CONCACAF i ta hasi un yamada na e klubnan Page 1 of 2 i e komunidat di futbòl en general pa traha di un manera konstruktivo na e implementashon di e akshonnan identifiká.

Presidente di FFB: “Nos ta duna hopi balor na e bishita di CONCACAF na Boneiru i na e oportunidat ku e bishita a duna nos pa nos por a dialogá ku e diferente stakeholdernan.

E diskushonnan tabata konstruktivo i a permití nos identifiká próksimo pasonan kla i práktiko. E plan di akshon ta duna un kuadro konkreto pa reanudá aktividatnan di futbòl, fortalesé e gobernansa , e struktura institushonal di FFB, i traha pa yega na elekshon nobo. FFB lo duna mas informashon tokante e implementashon di e plan di akshon i e próksimo pasonan pa e re inisio di futbòl i e trayekto pa reforsa gobernashon di e Federashon den e próksimo periodo.”

FUENTE: FFB/LIVE99FM