JAMES FINIES TA HASI YAMADA PA INKLUSHON KOMO KONDISHON ESENSIAL PA DESAROYO SOSTENIBEL NA FORO POLÍTIKO DI HALTU NIVEL DI NASHONAN UNÍ 

Kralendijk,- James Finies a partisipá na e evento ofisial paralelo di e High-Level Political Forum (HLPF) ku título: “For di Doha pa Akshon: Aselerando e Agenda 2030 pa medio di Enfoke Kolaborativo riba Efektonan Sekundario, Pobresa Multidimensional i Implementashon Integrá di e SDGnan”, tené na Sede Prinsipal di Nashonan Uní na New York.

E konferensia a reuní representante di gobièrnonan, e sistema di Nashonnan Uní, akademia i sosiedat sivil pa papia tokante maneranan práktiko di aselerá e implementashon di e Agenda 2030 pa Desaroyo Sostenibel, ku énfasis speshal riba pobresa multidimensional, koherensia den manehonan i garantisá ku ningun hende no lo keda atras.

Papiando na nòmber di e pueblo di Bonaire, Sr. Finies a ekspresa su apresio na e diskushon, pero el a enfatisá ku desaroyo sostenibel no por wordu alkansá ora e hendenan mas afektá ta ekskluí for di e desishonnan ku ta determiná nan futuro.

Durante su intervenshon, Sr. Finies a bisa:

“Mi ta James Finies di Boneiru, un isla den Karibe bou di atministrashon Hulandes for di 2010.”

Referíendo na e énfasis di e Foro riba koherensia den formulashon di maneho i eliminashon di bareranan struktural pa desaroyo sostenibel, el a hasi e siguiente pregunta:

“Den linea ku e kompromiso di Nashonan Uní pa “no lubida I laga ningun hende atras” i yega na esnan ku ta mas atras, kon e komunidat internashonal por spera ku Boneiru por alkansá e Metanan di Desaroyo Sostenibel si e desishonnan fundamental tokante nos desaroyo ta wordu tuma pa un gobièrnu Oropeo Hulandes miles di kilómeter for di Boneiru en bes di wordu tuma dor e pueblo di Boneiru mes?”

Sr. Finies a enfatisá ku desaroyo sostenibel ta eksigí mas ku solamente manehonan ekonómiko. E ta eksigí partisipashon real, gobernashon inklusivo i responsabilisashon na e pueblo kende nan bida ta wordu afektá direktamente.

Finies a konklui su intervenshon ku e siguiente pregunta pa e komunidat internashonal:

“No mester rekonosé inklushon berdadero, partisipashon demokrátiko, e derecho na outodeterminashon i responsabilidad komo kondishonnan esensial pa desaroyo sostenibel den teritorio manera Boneiru, ku no tin representashon, no tin supervishon di Nashonnan Uní, no tin responsabilidad dilanti di e komunidat internashonal, i ta wordu goberná eksternamente bou di e nivel di autogobernashon demokrátiko rekonosé pa Nashonnan Uní?”

E intervenshon na e foro ta basa riba preokupashonnan ku anteriormente a wordu presentá dilanti di mekanismonan di derechonan humano di Nashonnan Uní, inkluyendo e Komité di Derechonan Ekonómiko, Sosial i Kultural (CESCR), tokante pobresa, desigualdat, partisipashon den toma di desishon, identidat kultural, edukashon i desaroyo sostenibel na Boneiru.

E promesa di e Agenda 2030 pa “no laga ningun hende atras” mester apliká tambe na e pueblo di Boneiru. Desaroyo sostenibel ta eksigí ku hendenan ku ta biba den teritorionan goberná eksternamente mester wordu inkluí kompletamente den e desishonnan ku ta afektá nan futuro, i ku nan tin ku hañja partisipashon berdadero, transparensia i responsabilidad den e proseso di desaroyo.

James Finies I BHRO a reafirmá su kompromiso pa sigui traha konstruktivamente ku Nashonnan Uní, Estadonan Miembro, organisashonnan regional i sosiedat sivil pa promové derechonan humano, desaroyo inklusivo i oportunidat igual pa e pueblo di Boneiru.

FUENTE: JAMES FINIES