ARUBA: GOBIERNO NO POR LAGA PUEBLO PAGA E PRIJS DI E CRISIS DI HOSPITAL!

Oranjestad – E situacion na Hospital Horacio Oduber (HOH) a bira alarmante. Ora personal di hospital ta sinti nan mes obliga pa protesta pasobra falta di solucion financiero ta afecta nan trabou y e continuidad di cuido, nos ta enfrenta un crisis cu gobierno no por sigui ignora.

Como lider di oposicion, mi ta profundamente preocupa cu Gobierno ta demonstra poco urgencia y responsabilidad pa proteha e sistema di salud di nos pais.

E problema financiero entre AZV y HOH no ta culpa di e pashent e persona cu ta depende di tratamento, e enfermero, e dokter ni e otro profesional di salud cu ta dedica nan mes pa cuida nos comunidad.

Nos pueblo no ta culpabel. Y no ta husto pa laga pueblo paga e prijs!

Salud no ta un luho ni un servicio cu por keda den incertidumbre financiero. Ta trata di bida humano, dignidad y e derecho di cada ciudadano pa haya cuido medico di calidad.

Gobierno mester tuma responsabilidad y actua imediatamente. No mas adelanto temporal, no mas traspaso di problema di un presupuesto pa otro. Nos mester un solucion structural, transparente y sostenibel entre Gobierno, AZV y HOH.

Mi ta spera cu Gobierno pone e bienestar, e salud y e bida di nos ciudadano na prome luga.

Un gobierno ta wordo midi no solamente pa su cifranan financiero, sino tambe pa con e ta cuida su pueblo.

E pueblo di Aruba merece miho.

FUENTE: EVELYN WEVER-CROES( MEP ARUBA)/LIVE99FM