E SIMAN AKI TA UNO DI FIESTA PA E KLASE TRAHADÓ I SU FAMIA.

Kralendijk,- Komo resultado di un vishon kla definí di parti di sindikalismo, e klase trahadó organisá den un sindikato ta logra adelantonan supstanshal den nan kondishonnan i sirkumstansianan laboral. 

Fuera di e vishon kla definí, sindikalismo ta gosando di un rèspèt i rekonosementu serio di e kompanianan na unda e sindikato tin su representashon.

Diálogo ku rèspèt pa otro, negoshá ku dokumentashon komo base di deseo i eksigensianan di banda di e trahadónan i dokumentashon transpararente pa supstanshá posishon di e kompania ta kondusí na un esfera di profeshonalismo haltu na mesa di negosashon.

E promé CAO ku a keda firmá ta SELIBON. For di 2019 despues di a analisá e situashon na Selibon sindikalismo a skohe pa liderato.

A trese e partnernan ku mester di otro huntu, pero ku no semper tabata riba e mesun liña. A tene kuenta ku tur e interesnan di kada partner, a konstruí brùg, a restorá konfianza i semper  a para ariba ku sera Selibon no ta un opshon.

Sigur no pa e garantia di trabou di e trahadónan.

Pasobra tras di tur funshon den Selibon tin un hende. Tras di tur trahadó tin un famia. Tras di tur slep di salario tur luna tin un historia di responsabilidad, sakrifisio i trabou duru.

Pa esaki sindikato a lucha. Pues pa mas ku solamente sostené un kompania. Sindikato a lucha pa dignidat di e hende. Nos a lucha pa seguridad di trabou.

Pa perspektiva i futuro. I awe sindikato i trahadónan di Selibon por bisa ku nos ta orguyoso ku e esfuerzo komun a duna resultado. Selibon ta biba atrobe. Mas fuerte ainda Selibon a re-inventá su mes. Manera e fénix di e leyenda, Selibon a resusitá for di su mes shinishi.

Mas fuerte ku antes. Ku un bista nobo. Ku posibilidatnan nobo. I ku hende ku a proba ku nan ta dispuesto pa pone nan skoudernan huntu. P’esei laga nos no lubidá un lès importante. Solamente rekuperashon finansiero no ta hasi un organisashon eksitoso.

Mashinnan no ta konstrui futuro. Edifisionan no ta konstrui futuro. Kapital no ta konstrui futuro. Ta Hende ta konstrui futuro. E trahadónan di Selibon ta e kurason di e organisashon aki. Nan a hasi e trabou ora e inseguridat tabata haltu.

Nan a mantené konfiansa ora e situashonnan tabata difísil. Nan a keda laborá kada dia pa un Bonaire limpi, bibabel i sostenibel. Sindikalismo a mustra e forsa di UNION, sindikalismo a demostrá huntu ku tur partner envolví kon mester karga responsabilidat  i ku ounke un organisashon por ta na rant di abismo, kolaborashon i koperashon ta mas fuerte ku e desafio.

Esaki ta e berdadero nifikashon i e berdadero viktoria di e empleadonan i di nos tur. Na e klase trahadó un pabien ku AFBW por a firma ku kara na laira i ku orguyo un CAO nobo pa boso.

E otro pabien na e klase trahado ta ku sindikalismo atrobe demonstrando ku e forsa laboral ta den UNION i den nos propio man a logra ku Konseho Insular a deklará ku e 36 ora di trabou pa siman ta konta pa tur trahadó na Boneiru i spesifikamente pa esnan den kuido.

Despues di 3 aña ku Entidat Públiko i RCN den sekreto a entrodusí 36 ora di trabou pa siman komo norma pa nan empleadonan i literalmente a deskriminá nos klase trahadó na Boneiru, tabata danki na e manifestashon di e sektor den kuido i e pressentashon bibu den Konseho Insular di parti di AFBW i e propio trahadónan den kuido,  Konseho Insular a bin realisá ku nos no por ta lucha kontra deskriminashon i desigualdat kontra Ulanda, miéntras na kas mes nos mes ta deskriminá i trata otro desigual.

Sindikalismo kier tende den e próksimo reunion opinion di e 4 miembronan ku no por tabata t’ei pa nan deklará kla i raspá nan posishon riba e moshon ku a keda presentá djamrs 3 di novber 2026. Sindikalismo en todo kaso a prueba un biaha mas ku e por i ta para riba politika partidista i ta boga pa tur partido politiko para tras di un meta, un vishon bon kla definí.

Klase trahadó organisá en general i esnan organisá den kuido en partikular por ta sgiurá ku 36 ora di trabou lo ta e próksimo norma den e desaroyo laboral ku a kuminsá ku 96 ora pa dia, despues 48 ora pa siman pa bai na 40 ora pa siman i awor a yega e momento pa e bai na 36 ora.

DIGNIDAT di e hende ta eksigí esei pasobra edifisionan no ta konstrui futuro. Kapital no ta konstrui futuro i mashoinnan tampoko ta konstruí futuro.

Ta Hende ta konstrui futuro. Trahadónan di kualkier organisashon ta e kurason.

Forsa di e klase trahadó ta den UNION i no den para na banda sino man tené ku akshon den UNION.

FUENTE: NORWIN NÒCHI WILLEM KONSEHERO USIBO