Redakshon
Kralendijk,- Durante dos dia, 6 i 7 di novèmber, Boneiru a bira e sentro di konosementu, inspirashon i interkambio di eksperensia rònt di lesamentu i desaroyo di idioma. Bou di e tema «Lesamentu komo fundeshi pa desaroyo di idioma na Boneiru», Fundashon Lesa Ta Dushi (FLTD) a organisá un simposio ku a reuní profesionalnan di edukashon, ekspertonan di idioma i otro interesadonan pa eksplorá e importansia di stimulá plaser di lesa entre mucha i hóbennan.
Ku 40 partisipante riba e promé dia i 35 riba e di dos dia, e simposio a konta ku un bon partisipashon. E dos dianan tabata dediká na interkambio di konosementu, eksperensia i idea práktiko pa fortifiká e kultura di lesamentu na Boneiru.
E simposio a bira posibel ku sosten finansiero di Literatuur Caribe i Nederlands Letterenfonds, loke a hasi posibel pa tur partisipante tuma parti sin gastu.
Kuater presentadó ku perspektivanan inspiradó
Durante e simposio, kuater presentadó a kompartí nan konosementu i eksperensia pa via di presentashon i workshop interaktivo.
Evelien van Dort, outor Hulandes di buki pa mucha i hóbennan, ku tin mas ku 90 publikashon na su nòmber, a mustra kon buki di mucha por kontribuí no solamente na plaser di lesa, sino tambe na formashon di identidat i bienestar mental di mucha. Den su workshop interaktivo, el a ofresé ehèmpel i instrumento práktiko pa hasi uso di buki tantu na kas komo den enseñansa.
Jakeema Hernandez a pone énfasis riba e balor di lesa pa mucha. El a indiká ku lesa un kuenta ta bai hopi mas leu ku solamente konta un storia. Su koleganan Mirthe i Jennyfer, di Biblioteka Públiko di Boneiru, a demostrá kon profesionalnan di kuido i edukashon por transformá buki di ilustrashon den aktividatnan kreativo i den forma di wega ta stimulá desaroyo di idioma, abilidatnan sosial i plaser di lesa.
Mazarella Jansen, eksperto di idioma, a enfatisá e papel fundamental di lenga materno den desaroyo kognitivo, formashon di identidat i proseso di siñamentu di mucha. Ku atenshon spesial pa Papiamentu, el a pone énfasis riba e importansia di edukashon multilingwe i di preservá, fortifiká i duna mas espasio na nos propio idioma Papiamentu i kultura.
Xiomara Frans a presentá su proyekto «Mi historia, mi idioma», kaminda alumnonan ta haña e oportunidat pa skibi nan mes istoria na Papiamentu, Hulandes, Ingles òf Spañó. E proyekto ta stimulá kreatividat, talento di skirbimentu i multilingualismo . Ademas e ta duna mucha e oportunidat pa lesa istoria ku ta konektá ku nan propio bida, kultura i eksperensia.
Di konosementu pa práktika
Un di e metanan prinsipal di e simposio tabata pa tradusí konosementu den akshon. E partisipantenan a haña ideanan i método práktiko pa integrá lesamentu i desaroyo di idioma mas fuerte den enseñansa i kuido di mucha.
Atenshon spesial a bai na e importansia di stimulá plaser di lesa for di edat chikitu, lesa den lenga materno i hasi uso di buki di mucha komo instrumento pa desaroyo di idioma, formashon di identidat i bienestar sosial i emoshonal.
Tambe a resaltá ku stimulá lesamentu no ta un responsabilidat di skol so. Mayornan, skolnan, profesionalnan di edukashon i organisashonnan komun mester traha huntu pa duna mucha i hóbennan mihó oportunidatnan pa desaroyá nan kapasidatnan di idioma.
Un regalo pa kada partisipante
Pa sera e simposio, tur partisipante a risibí un pakete di buki ku ta inkluí publikashonnan di Fundashon Lesa Ta Dushi (FLTD). Ademas, kada partisipante a risibí un sertifikado di partisipashon.
Ku e gesto aki, FLTD no solamente kier a gradisí e partisipantenan pa nan presensia i kontribushon, sino tambe stimulá nan pa sigui promové lesamentu i hasi uso di buki den nan propio ambiente di trabou i enseñansa.
Huntu pa un futuro ku mas lesamentu na Boneiru
E simposio a laga un mensahe kla: lesamentu ta hopi mas ku siña lesa i komprondé teksto. Lesamentu ta habri porta pa desaroyo personal, kreatividat, konfiansa den mes, konosementu i konekshon ku nos propio idioma i kultura.
Lesa ta forma e base pa siñamentu, pensa, komuniká i partisipá kompletamente den komunidat.
Ku e simposio di dos dia aki, Fundashon Lesa Ta Dushi a kontribuí na fortifikashon di konosementu i konsientisashon tokante e importansia di lesamentu i desaroyo di idioma na Boneiru.
E ambishon ta pa sigui traha riba e konekshonnan i ideanan ku a nase durante e simposio, pa asina mas mucha i hóbennan haña e oportunidat pa disfrutá di lesa i desaroyá nan kapasidatnan di idioma.
Pasobra invertí den lesamentu ta invertí den futuro di nos muchanan i futuro di Boneiru.
FUENTE: FUNDASHON LESA TA DUSHI BONAIRE/LIVE99FM
GIPHY App Key not set. Please check settings