Redakshon
Kralendijk,- Bonaire Human Rights Organization (BHRO) ta sigui sigurá ku Boneiru su bos ta wordu skuchá riba e esenario internashonal.
Durante e 13 Seshon di Mekansimo di Ekspertonan tokante Derecho di Desaroyo na Sede di Nashonan Uni na New York kaminda BHRO a hasi kuater intervenshon fuerte dilanti e distinguí panel di Nashonan Uni I estadonan miembro inkluyendo Union Oropeo I Hulanda.
Presidente di BHRO, Davika Bissessar Shaw, a dirigí e seshon, mientras ku Fundado di BHRO, James Finies, a hasi tres intervenshon adishonal durante dos dia, poniendo Boneiru su preokupashonan direktamente dilanti di Nashonan Uni.
James Finies den su intervenshonan a enfatisá ku berdadero desaroyo nunka no por eksistí kaminda un pueblo ta wordu nenga partisipashon kompleto den desishonnan ku ta afektá nan tera, identidat, kultura i futuro. El a advertí ku pueblo chikí insular i pueblo no autónomo no mester keda atras den agenda global di desaroyo.
Dor di e serie di intervenshonnan aki, BHRO un biaha mas a demostrá un lucha internashonal persistente, sigurando ku Boneiru su preokupashonan tokante derecho humano, dignidat, igualdat i desaroyo ta keda firmemente registrá den salonan di Nashonan Uni.
Despues di añanan di neglisensia I ignorashon sistematiko di Boneiru su derechonan desde e restrukturashon inkonstitushonal di 10-10-10, ministerionan hulandes, parlamentonan i institushonan nashonal I estatal ta wordu forsá kada biaha mas pa respondé, drenta diálogo, revisá manehonan i inisiá kambionan riba asunto nan ku nan a ignorá pa hopi tempu.
Tur e kambionan ku awor ta tuma lugá na Boneiru ta resultado direkto di James Finies I BHRO su intervenshonan na Nashonan Uni i otro foro internashonal. Segun BHRO, e movimientonan aki no ta akto di bon intenshon, sino e reakshon forsá na e eksposishon internashonal sostené di Boneiru su krísis di derecho humano, gobernashon i outodeterminashon.
FUENTE: BONAIRE HUMAN RIGHTS ORGANIZATION
GIPHY App Key not set. Please check settings