ARUBA: YA CU MINISTER DOWERS NO SA SU TRABOU, LAGAMI YUDA MINISTER DOWERS, CON PA RECOBRA E PLACA Y TERENONAN DEN CASO AVESTRUS

Oranjestad – Despues di e decision di Hoge Raad den e caso “Avestrus”, Aruba ta para dilanti di un reto grandi: con pa recupera e daño financiero causa pa corrupcion.

Den un reunion publico, Lider di Fraccion di MEP, Evelyn Wever-Croes, a puntra Minister Dowers ki dia e ta cuminsa cu e proceso pa recobra e placa y terenonan. Pa sorpresa di tur hende minister Dowers a contesta cu e no sa con pa haci esaki. Pa MEP, esaki ta preocupante, pero alabes un oportunidad pa mustra liderazgo constructivo. MEP no ta señala problema so, MEP ta contribui cu solucion tambe.

P’esey, MEP ta presenta un guia di pasonan, den lineanan grandi, cu gobierno por tuma inmediatamente:

Forma un taskforce multidisciplinario, consistiendo di Ministerio di Husticia, Infrastructura y Finanzas, pa coordina tur accion.

Haci un investigacion financiero profundo, apunta expertonan pa analisa tur transaccion pa determina con grandi e daño ta y kennan a wordo beneficia.

Cuminsa un proceso civil, demandando personanan implica pa recupera placa, basa riba acto ilicito y enriquecimiento ilegal.

Reclama e daño bek di (ex-)funcionarionan den caso di culpa grave of intencional (regres).

Pone beslag riba propiedad, pa evita cu placa of terenonan wordo scondi of bendi.

Usa instrumentonan penal existente, manera confiscacion di ganashi ilegal y compensacion pa e pais.

Busca cooperacion internacional, si tin placa den exterior, traha cu otro paisnan pa recupera esaki.

Reviza decisionnan y otorgamentonan, si nan a wordo haci bou di corrupcion, mester wordo cancela of corrigi.

Reforsa capacidad legal, si ta necesario, trece experto externo pa yuda den proceso di ‘asset recovery’.

Segun Lider di Fraccion di MEP, e pasonan aki no ta complica, pero ta exigi decision, conocimiento y boluntad politico.

“Pueblo di Aruba tin derecho di sa con nan placa a wordo maneha, y tambe pa mira cu gobierno ta haci tur esfuerso pa recupera esaki,” asina Evelyn Wever-Croes a expresa.

MEP ta haci un yamada na Minister Dowers pa tuma responsabilidad y traha hunto cu Parlamento pa logra resultado concreto.

E lucha contra corrupcion no ta termina cu un sentencia; e ta cuminsa cu responsabilidad y accion.

FUENTE: PARTIDO MEP/LIVE99FM