ARUBA: EVELYN WEVER-CROES: NOS KIER MAS TURISTA NA ARUBA, OF NOS KIER MAS BALOR DI TURISMO?

Oranjestad,- Den conferencia di prensa e siman aki lider di fraccion di MEP, Evelyn Wever-Croes a toca e tema di sobre turismo “over tourism”. Algo cu ta trece presion riba trafico, vivienda, infrastructura y nos medio ambiente. Y pa esey tin un solucion: “high value low impact tourism model”. Ex minister president a papia di e problema y e solucion.

Segun sra. Wever-Croes ta importante pa nos haci nos mes un pregunta honesto: nos kier mas turista, of nos kier mas balor di turismo? E solucion presenta pa su gobierno, Gabinete Wever-Croes 2, di “High Value, Low Impact” kiermen: crea mas balor economico cu menos presion riba nos pais y nos comunidad. Pero nos no ta mira cu e maneho aki ta wordo ehecuta, y e gobierno aki ta busca mas y mas asientonan aereo y mas y mas turista.

E realidad ta cu expansion di asientonan aereo y crecemento den cantidad di bishitante ta haci dificil pa baha e impacto. Aruba no por sigui crece sin defini limite y sin crea un balansa cla entre economia, comunidad y medio ambiente.

Turismo no ta solamente un tema economico. E ta toca calidad di bida, costo di bida, vivienda, naturalesa y futuro di nos pais. Si nos kier un modelo berdadero di High Value, Low Impact, tin hopi cos cu nos mester haci. Nos mester, no solamente mira cantidad, sino specialmente balor cu turismo ta trece. Nos mester proteha nos capacidad di carga, pasobra nos ta un isla, cu limitacionnan. Nos mester inverti den calidad di bida di nos ciudadanonan. Y nos mester percura cu mas di nos economia local ta beneficia di turismo. Aruba ta na un crusada: no pa ta nos ta e mas grandi, sino pa ta e destinacion miho maneha y mas balansa.

“Exito bo no ta midi den cuanto nos ta crece, sino den con nos ta crece. Esey ta e reto berdadero pa futuro di Aruba. Y desde Parlamento, nos fraccion di MEP lo tuma iniciativa pa logra ehecuta e vision High Value, Low Impact di berdad. Pa asina Aruba ta un luga dushi pa biba, y pa e ora e ta un lugar dushi pa bishita”, lider di fraccion di MEP a trece padilanti.

FUENTE: PARLAMENTARIO EVELYN WEVER-CROES (MEP)/LIVE99FM