SELEBRASHON DIA DI DUANA –

Kralendijk,- Na okashon di selebrashon di Dia di Duana, sindikato ABVO Boneiru a ekspresá su mas profundo apresio i rekonosimentu pa tur trahadónan di duana ku ta sirbi nos komunidat ku dedikashon i integridat.

E presidente di ABVO Boneiru, Tafila Janga, a indiká ku ta un gran honor pa e, komo representante di un di e sindikatonan ku ta defendé trahadónan den aparato gubernamental, ekspresá palabranan di gratitut na tur duanero.

Den su diskurso, Janga a resaltá ku e duaneronan ta ehersé un trabou di gran balor pa nos komunidat. Nan ròl ta fundamental den e funshon ku tur dia nan ta kumplí, kargá responsabilidat, protehá i fasilitá moveshon di merkansia i persona riba nos islanan.

ABVO Boneiru ta rekonosé ku sin e dedikashon i esfuerso kontinuo di e duaneronan, nos sistema no por funshoná na e nivel di seguridat i efisiensia nesesario.

Nos lema, “Trato igual, hustisia sosial,” no ta solamente un slogan, sino un prinsipio ku ta guia tur akshon di nos organisashon. Hustisia berdadero ta kuminsá ku trato igual pa tur hende, sin diskriminashon, sin preferensia, i ku rèspèt pa lei. Esaki ta presisamente loke trahadónan di duana ta representá i defendé tur dia.

Ku profeshonalismo, integridat i dedikashon, duana ta garantisá ku reglanan ta wòrdu apliká di manera hustu i konsekuente, segurando ku ningun hende ni instansia por violá lei. ABVO ta konsiente ku e trabou ku e duanero ta hasi no semper ta fásil, pero semper ta esensial pa mantené órden i hustisia den nos komunidat.

Direktiva di ABVO ta ekspresá su mas sinsero apresio i sosten kontinuo na tur trahadó duanero. Huntu, nos ta sigui lucha pa kondishonnan di trabou hustu, rèspèt mutuo i un futuro kaminda trato igual i hustisia sosial no ta solamente palabranan, sino realidat.

ABVO Boneiru ta reafirmá su kompromiso pa para semper huntu ku e trahadonan ku ta nos miembronan.

FUENTE: ABVO/LIVE99FM