HOPI DISKUSHON INNESESARIO TOKANTE SELIBON A BOLBE LANTA KABES

Kralendijk,- Sin ku ta trese dilanti e problema real ku Selibon ta konfrontando, pero mas importante ainda kon ta bai solushoná e problema.

Siman pasá e kolumna aki  a informá komunidat ku riba inisiativa di sindikato tur enbolbi ku Selibon a bin huntu pa visualisá e problema di Selibon pero atrobe mas importante a presentá e solushon. Ya nos a kuminsá mira fruta di e reunion aki.

Diputado Weber a deklará ku Kolegio ehekutivo lo asumi su responsabilidat den dos sentido, esta uno ta ku ora risibi e analisis finansiero lo sipulá tarifa pa rekohé sushi na kas i na kompanianan  i e pago pa e kontrato di kuido pa tene Boneiru limpi.

Tur dos lo mester reflehá preisnan realistiko kaminda entradanan lo mester kubri e gastunan. Esei lo ta e fundeshi pa un operashon finansiero-ekonómiko sano ku lo kumpli ku e promé tarea di e kompania esta di rekohé sushi i basha sushi na lèntfel.

E di dos aspekto ku e diputado a trese dilanti ta ku Selibon mester di un inyekshon finansiero AWOR i no mañan. De fakto e inyekshon aki mester a bin for di ayera.

E inyekshon aki ta sumamente nesesario pa riba término kòrtiku, esta e aña aki mes lo tin kompromiso pa kompra di ekipo i material adekuá, den bon kondishon i ku ta garantisá seguridat pa e trahadó por duna máksimo na produktividat.

Esaki ta e eksigensia mas fuerte ku sindikato a pone riba mesa i kaminda a bisa bon kla ku si esaki no sosodé lo no mester eksklui akshonnan fuerte pasobra e situashon aki no ta akseptabel ni tolerabel mas. Ta basta papia, ta basta skibi karta bai bin, ta basta tira falta riba otro.

Pa atendé e inyekshon aki tambe sindikalismo a proponé pa bai Konseho Insular i nos por a skucha diputado Weber bisa ku pa e por atendé ku e inyekshon finansiero ku ta nesesario, Konseho Insular ta esun ku mester aprobá un kambio den presupuesto i pone e fondonan aki disponibel.

Si Kolegio Ehekutivo segun CFT den un forma ilegal a destiná 20 mion sin aprobashon i sin kana e proseduranan legal, Konseho Insular lo no por tin ningun argumento bálido pa nenga e inyekshon finansiero rekerí. Si ta laga 30 mion dòlar keda riba planki sin usa i si tin reservanan di miones, Konseho Insular asumí su responsabilidat pa ku medio-ambiente i naturalesa limpi, pa ku salú i higiena di henter pueblo boneriano i perkurá AWOR pa Selibon por operá sanamente.

Entre tantu a hasi petishon pa informá Konseho Insular i tin tur indikashon ku Konseho Insular a komprondé e seriedat i e urgensia di e kaso Selibon i ku den e siman aki lo por tin e reunion aki. Sindikalismo un biaha mas ta rekonfirmá ku lo no sigui tolerá ni akseptá e situashon aki mas tantu tempu i ku nos kier mira akshonnan konkreto di parti di esnan ku ta karga responsabilidat pa Selibon.

I si nan no por para ku firmesa huntu ku sindikato, mihó nan tene honor na nan mes. Pero tambe nos atvertensia ta ku si nan no aktua ku e seriedat nesesario, no bin yora mañan ku kisas un biaha mas Ulanda kita outoridat for di nan pa motibu di negligensha serio di nan tarea.

Ulanda a manda e señalnan kaba ku nan lo kier duna mas poder na un persona hasta no demokrátikamente eskohé pa e tuma supervishon over for di Konseho Insular i ta netamente Selibon su situashon nan a usa pa motivá nan desishon.

Nos a proba ku nos por para huntu i resistí ku bon argumentu ku seramentu di BONLAB no tabatin base i awe Boneiru por ta oguyoso ku nos BONLAB t’ei pa keda i ku nos a prueba ku nos por karga responsabilidat pa e ambishon ku nos tin pa mas tantu posibel outogoberná nos mes.

No ku palabranan bashí, no ku terkedat, no ku hunga mas sabí, no ku konfrontashon sino ku akshon komo prueba. Ketu bai ta na vigor ku e palu ta na su frutanan bo ta rekonosé. A bai hasta korte pa defendé e prinsipio di outogobernashon, hues a duna e oportunidat for di februari di e aña aki.

Awe nos ta na mitar di luna nuebe faltando 2 luna i mei pa terminá e aña i ainda nos no a solushoná e problema fundamental di Selibon. 

Lo rabia pero ke asi sea, e logo riba kurá di AFBW ta papia palabra kla. Si bo no ta goberná pa siribi, bo no ta sribi pa goberná.Ta na boso gobernantenan i representantenan pa prueba ku e logo no ta konta pa boso.

FUENTE: NÒCHI WILLEM/LIVE99FM