PÈRMIT DI TRABOU PA 3 AÑA TA POSIBEL

Kralendijk,- Den e artíkulo aki Fundashon Union di Imigrantenan Boneriano (‘FUIB’) ta hala atenshon spesífikamente di doñonan di trabou. Kustumber ta ku doñonan di trabou tin ku pidi un pèrmit di trabou pa kada trahadó un biaha pa aña. Esei ta tuma hopi tempu. Pa spar tempu y sèn, por pidi un pèrmit di 3 aña tambe. Lei ta pèrmití esei.

Doñonan di trabou por opta pa esaki. Por ehèmpel, si despues di e promé aña un trahadó a kumpli bon, e doño di trabou por pidi un pèrmit di trabou pa tres aña a base di art. 7 di e Lei trabou imigrantenan BES (na Hulandes:  Wet arbeid vreemdelingen BES). Pa por hasi esei, e doño di trabou ta duna e trahadó un kontrato di trabou nobo pa un periodo di tres aña. A base di esei ta pidi un pèrmit di trabou pa 3 aña.

Hasiendo esaki, tantu e doño di trabou komo e trahadó ta haña benefisio.

FUIB tin intenshon pa habri kombersashon ku organisashonnan di doñonan di trabou pa wak kon por koperá na benefisio di tantu doñonan di trabou komo trahadónan imigrante.

Kualkier imigrante ku ta deseá di haña mas informashon presiso over di esaki of otro problema hurídiko por tuma kontakto ku Direktiva di FUIB (yama: 787 2373) of por pasa libremente na nos Konsultorio hurídiko grátis tur djasabra di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

 FUENTE: FUIB/ ABOG. M. BIJKERK