POLÍTIKONAN  BONERIANO TA PREPARANDO PA ELEKSHON 2027 – “STOELENDANS” DI TRAISHON, ENGAÑO I MANIPULASHON DI PODER

 Kralendijk,- E renunsianan repentino di deputadonan Nina Den Heyer i Anjelica Cicilia ku sonrisa grandi manera ta djis un otro wega polítiko i manipulashon eksitoso di pueblo, no ta nada nobo. E ta reflehá e kultura i praktikanan polítiko hopi antikua di polítikonan sin berguensa, ku ta pone interés personal i di partido promé ku bienestar di pueblo ku nan ta pretende di sirbí.

Mientras e polítikonan aki ta hari saka djente i selebrá, e pueblo Boneriano ta sigui sufri.

E mesun modus operandi a tuma luga na medio 2017 ora Clark Abraham, ku tabata na fin di su “wachtgelduitkering” salario komo ex-deputado, intenshonalmente a tumba su mes gobiernu di su mes partido Demokrat pa forma un gobierno nobo komo independiente bou di Frakshon Liberal den koalishon ku MPB— I bira deputado bek pa sigui kobra salario di deputado.

E akshon aki tabata pa interes personal i no interes di pueblo, I un traishon di pueblo Boneriano i ku a hundi e pueblo mas den e trampa konstitushonal Hulandes.

E resignashon resiente ta wordu mira komo un akto kalkulá di manipulashon polítiko, kual Den Heyer su motibu pa baha ta, komo “vakgedeputeerde” ,ta otro manipulashon politiko.

Den Heyer  awor ta bira un “vak-politiko”, despues di tabata e politiko ku a hanja mas voto den ultimo elekshon pa MPB i sigur konosí pa  “no por kome autonomia” pa hustifiká e takeover dor di gobierno Hulandes.

Awor Den Heyer ta realisá ku komo deputado e no tin poder real. Ku e preshon históriko i internashonal ku ta kresiendo di James Finies i BHRO, Den Heyer ta parse pa no wordu rekorda pa tabata na e banda robes di historia pa ta komplise ku e traishon di derechonan di pueblo Boneriano.

Sra. Cicilia, ku ta bini di un famia polítiko den liderazgo di DP, a wòrdu mandá aña pasa na konferensia  SIDS na Antigua I Barbuda bou di pretenshon falsu pa promové interés Hulandes.

Ayá na konferensia, Cicilia a wordu forsa pa lesa un presentashon prepara pa Hulanda tokante awa seru a kai na Boneiru i “bleach-mentu” di rif I koral na Boneiru, I fingi komo representante di Boneiru su interes. Pero, e no tabatin permiso pa bisa o papia di e berdadero krisis: e “bleach-mentu” demografiko di Boneiru, kaminda e pueblo nativo Boneriano ta wòrdu elemina na un ritmo alarmante, i remplasa pa Hulandesnan Oropeo I otronan.

Awe, e nativo Boneriano ta forma apenas 30% di populashon I a bira minoria riba su mes isla. I ta enfrentando eliminashon étniko i kultural den su mes tera.

Hopi mama ta traha dos òf tres trabou pa por duna nan famia di kome, mientras hubentut Boneriano ta wòrdu margina den un sistema edukativo trapando nan derechonan ku ta empujá nan na desesperashon, kriminalidat, i un futuro skur.

Renunsiando awor, Den Heyer i Cicilia ta garantisá aunkue si nan no wòrdu re-nombra ò no haña un otro posishon di liderazgo na man di gobierno Hulandes, nan lo sigui risibí salario di deputado pa e siguiente dos aña—te kana yega elekshon di 2027. Den e periodo ku ta bini aki, nan “trabou” prinsipal lo ta keda polítikamente aktivo i kore kampaña. Si nan wòrdu nombra atrobe despues di elekshon di mart 2027, nan salario lo sigui kore sin niun interupshon.

E manipulashon politiko aki, lo trese nombramentu di dos deputado nobo—pa sirbi interesnan di partido. E deputadonan nobo aki lo risibí salario kompletu mientras nan ta dediká nan tempu na kampaña pa elekshon 2027.

Boneiru lo tin alomenos kuater polítiko aktivo husando fondo públiko pa sostené un sirkulo o siklo di autoprotekshon I mantenshon di poder polítiko.

Si pueblo no keda alerta, e patrónchi akí lo ripití sigur atrobe prome ku elekshon benidero: renunsianan, tumbamentu di gobierno I nombramentunan nobo – disfrasa manera ta liderazgo mientras ta simplemente kampanja ta kore pa elekshon 2027.

E polítikonan aktual—hopi di nan a switch di partido, a duna o lanta partido ku nomber nobo, deklara nan mes independiente o forma koalishonan nobo, tur ta parti I a keda stanka den e klase o klan politiko establese.

Nan a transforma di DP pa UPB pa MPB i awor M21 ets, ta e mesun famianan i karanan ku a ankra Boneiru den e struktura konstitushonal Hulandes ku pueblo nunka no a skohe. Dirigí di patras di kortina pa mesun konseheronan, e politikonan manera Cyrill Vrolijk i Daisy Coffie, i inkluí Clark Abraham—ku a traishoná su partido DP  I e pueblo su voto “No” den referéndum 2015— ta nan a habri porta pa Hulanda drenta pa elemina i para riba demokrasia, ley internashonal, i e derechonan humano di pueblo Boneriano.

FUENTE: JAMES FINIES