Redakshon
Kralendijk, – Na okashon di Dia di Labor, Presidente di ABVO a dirigí un mensahe na tur trahadó, ekspresando e importansia di e dia aki den historia di lucha sindikal i den defensa pa derechonan laboral.
Presidente di ABVO a enfatisá ku riba promé di mei nos ta honra esnan ku, durante generashonnan, a para firme pa igualdat, dignidat, siguridat na trabou i hustisia sosial. “E frutanan di nan lucha nos ta mira tur dia den tur sektor di nos komunidat,” segun e Presidente.
Preokupashon tokante posibel medidanan di Hulanda
Resientemente a sali informashon den media ku gobièrnu di Hulanda ta debatí posibel redukshon di gastu den aparato públiko. Segun e informashon disponibel, esaki por tin konsekuensia pa trahadónan di RCN. ABVO ta hasi un yamada kla: empleadonan di RCN mester ta mas envolví ku nan sindikato, pa huntu nos por para firme ora desishonnan ku por afektá nan bienestar ta wòrdu tuma.
Negoshashon lokal i desaroyo den sektor di enseñansa
ABVO ta prepará pa kuminsá negoshashon ku OLB tokante “arbeidsvoorwaarden”
Den sektor di enseñansa, ta biba e deseo pa yega na un CAO general pa duna mas klaridat i stabilidat na tur profeshonal den e área aki.
E sindikato ta afirmá su kompromiso pa mantené tur miembro informá di tur paso, palabrashon i proseso di negoshashon.
AI i futuro di trabou
Un otro punto importante di e diskurso tabata e desaroyo galante di Inteligensia Artifisial.
ABVO ta mira AI manera un reto i un oportunidat, i ta sinti su mes responsabel pa prepará e klase trahadó pa e kambio aki.
E Presidente a enfatisá ku balor di trabou humano no por keda den sombra di teknologia, i ku un futuro salú i hustu ta basa riba balansa entre teknologia i humanidat.
Mensahe final
“Ningun kos den e mundu laboral tin mas balor ku e hende.
Biba Dia di Labor.
Biba solidaridat.
Biba tur trahadó.”
FUENTE: ABVO/LIVE99FM
GIPHY App Key not set. Please check settings