ABVO BONEIRU TA SELEBRÁ DIA INTERNASHONAL DI HENDE MUHÉ 2026

Kralendijk,- Djadumingu 8 di mart, ABVO Boneiru a selebrá ku orguyo i gratitut Dia Internashonal di Hende Muhé, un okashon dediká na honra tur hende muhé, tantu e miembronan femenino di e sindikato i tambe esnan ku no ta miembro.

E selebrashon a tuma lugá den un ambiente yen di energia, union i rekonosimentu, kaminda un gran kantidat di hende a asistí.

E apertura ofisial a wòrdu hasi dor de e Presidente di ABVO Boneiru, Sra. Tafila Janga, ku den su palabra di bonbiní a enfatisá e balor i dignidat di hende muhé komo ser humano. Sra. Janga a invoká riba tur hende muhé pa keda fuerte, konsiente di nan balor, i sigui kontribuí na komunidat i den nan labor ku determinashon i orguyo.

E evento a tuma lugá na Habitad. E oradó prinsipal pa e evento tabata Sra. Nilva Wout, ku a kompartí un diskurso inspirativo na tur esnan presente, tokante kresementu personal, liderato femenino, i e retonan ku hende muhé te ainda ta enfrentá den sosiedat moderno. Su refleho i motivashon tabata basa riba eksperensia di su propio desaroyo profeshonal den enseñansa.

Durante e selebrashon tabatin tambe un pènel di diskushon ku panelistanan di diferente área, ku a kompartí nan eksperensia i perspektiva riba tema manera empoderashon, balansa entre bida personal i profeshonal, i importansia di sostené otro muhé den tur fase di bida. Komo ehèmpel e panelistanan a mustra riba e ròl di hende muhé komo maestra i mama den edukashon di nos yunan. E ròl aki ta relashoná direktamente ku e lema di e dia internashonal di hende muhé: “Give to Gain” ,Loke bo sembra awe, bo ta kosecha mañan.

ABVO Boneiru ta gradisí tur hende ku a kontribuí na e evento i ta reafirmá su kompromiso pa sigui defendé i promové derecho, bienestar i oportunidat igual pa tur hende muhé na Boneiru.

Panelistanan tabata Tafila Janga,  Julissa de Grijze, Ilviena Carolina- Leito, i Nilva Wout.

FUENTE: ABVO/LIVE99FM