Redakshon
Willemstad/ Philipsburg,- Djaluna último a inisiá a e di 48 reunion di Komité di Orkan na Mexico City.
E tema pa e reunion aki ta un yamada pa sigui fortifiká kooperashon regional debí ku siklonnan tropikal ta birando mas fuerte.
Direktor- i ekspertonan di servisionan meteorológiko nashonal di paisnan di Nort i Sentro Amérika i Área di Karibe lo analisá huntu e Temporada di Orkan 2025 i ahustá strategianan regional, di forma ku por sigui mehorá pronóstikonan i produkshon di avisonan ofisial. Mas aleu, durante di e reunion lo sigui elaborá riba preparashon pa e Temporada di Orkan 2026.
Durante e segmento tokante di paisnan afektá pa siklonnan tropikal durante di aña 2025, sr. Albert Martis, direktor di Meteo, den su kalidat komo Representante Permanente di Kòrsou i St. Maarten na Organisashon Mundial di Meteorologia (OMM), a indiká ku nos ta hopi orguyoso di por a kontribuí ku dato i informashonnan di radar i opservashonnan na nivelnan mas haltu di atmósfera (radiosonde) pa region di Karibe. Esei a kontribuí na mehorashon di modelonan di wer pa siklonnan tropikal ku a krusa den nos region.
Na final di e reunion Komité di Orkan 2026 lo resumí tur e strategianan nobo ku mester ser implementá na nivel nashonal. Di forma ku lo fortifiká e parti di monitoreo, komunikashon, preparashon i akshonnan na nivel nashonal i koordinashon regional.
Servisio Meteorológiko Kòrsou ta sigui invertí den desaroyo di personal i sistemanan moderno, pa asina sigui protehá bida i propiedat.
FUENTE: SERVISIO METEOROLÓGIKO KÒRSOU/LIVE99FM
GIPHY App Key not set. Please check settings