ABVO I ACU TA UNI FORSA PA UN FUTURO  FINANSIERO STABIL.

Kralendijk,- Djabièrnè 20 di febrüari, ACU (Kooperativa di spar i Krédito) i ABVO Boneiru a organisá un Happy Hour spesial, destiná pa tur miembro di ABVO ku ainda no ta miembro di ACU.

E evento sosial a tuma lugá na Sede di ABVO Boneiru. E meta prinsipal tabata pa duna informashon balioso tokante fondo di krédito i spar. Tambe pa ilustrá kon e servisio di ACU por kontribuí na un futuro finansiero mas stabil pa trahadó na Boneiru.

ABVO den su empeño kontinuo pa alsa nivel sosial i bienestar di su miembronan, i partikular di trahadó na Boneiru, ta mira tipo di eventonan sosial informativo komo un parti importante di nos responsabilidat. Ku e evento aki, e organisadónan kier fasilitá un ambiente amigabel i habrí un kaminda pa diálogo, orientashon i informashon klaro riba e benefisiosonan ku un kooperativa di spar i krédito por ofresé.

E evento a duna partisipantenan e oportunidat pa hasi pregunta, haña informashon personalisá i deskubrí kon ACU por sirbi komo un partner finansiero viabel den nan bida di tur dia.

Den e marko di selebrashon di su 90 aniversario ABVO ta sigui organisá eventonan informativo ku temanan sosial i komunitario pa su miembronan. ABVO ta kere ku kada trahadó meresé un nivel di bida ku ta reflehá su esfuerso i su aportashon na komunidat.

ABVO i ACU ta kompartí un kompromiso komun: empoderá trahadó di Boneiru ku konosementu finansiero i aksesibilidat na servisio ku por kontribuí na un futuro mas sigur.

Nos ta gradisí tur partisipantenan pa nan presensia i interes. Nos ta spera ku e informashon kompartí lo sirbi komo un base firme pa tuma desishon finansiero mas konsiente. Huntu, nos ta traha pa fortalesé komunidat Boneriano i pa kontinuá ofresé oportunidatnan ku ta reflehá balor, progreso i bienestar pa tur trahadó.

FUENTE: ABVO BONEIRU/LIVE99FM