15 OUGÙSTES 2026 LO DRENTA HISTORIA SINDIKAL DI BONEIRU KOMO UN DIA HISTÓRIKO DEN UN LUCHA HUSTIFIKÁ PA DIGNIDAT, VITALIDAT, SALÚ.

Kralendijk,- Mas tempu pa famia di e trahadó den kuido riba e islanan Boneiru, Saba i Sint Eustatius.

 Ku e lucha aki sostené pa sindikatonan di Aruba, di Kòrsou di FNV Hulanda i FNV Internashonal un biaha mas sindikalismo na Boneiru a demonstrá di ta ehekutá e agènda sindikal, esta defendé, protehá i sali na interes di e klase trahadó i su famia.

For di 4’or di atardi trahadónan na e 5 islanan sea fisikamente o spiritualmente, tabata uní pa e kousa, pa e meta, esta entrodusí 36 ora di trabou pa siman komo norma.  No pa gana mas sèn, ni tampoko pa traha ménos ora, sino primeramente pa kuida esnan ku ta kuida nos 24/7 sin konosé fin di siman, djasabra, djadumingo, dia di fiesta, den dia o mardugá, dia di fakansi, ets.

Ku esaki nos ta garantisá kalidat di kuido mas haltu i bon, trahadónan vital i salú, pero tambe trahadónan ku mas tempu pa nan bida sosial i familiar, pues un balansa entre bida di trabou i bida privá.

Banda di esaki ku mehorashon di e kondishonnan laboral, traha den kuido lo bira mas atraktivo i nos lo por trese nos profeshonalnan den kuido ku ta pafó di Boneiru bèk nan isla i esnan ku nos tin aki kaba, nos lo por mantené nan i asina garantisá ku nos kuido ta duradero pa futuro tambe.

Nos ta sumamente orguyoso di tur e trahadónan ku riba djasabra atardi den un higra di solo a sali no solamente pa nan mes den kuido, pero tambe pa tur otro trahadó den otro sektornan di nos merkado laboral, mandando e señal kla ku no tin dalmentu di niun paso atras.

36 ora ku mantenshon di salario i derecho riba penshun mester bira norma na Boneiru. Nan a duna e ehèmpel ku den bida bo no ta haña nada por nada i ku tur benefisio ta bin despues di sakrifisio. Nan a duna e ehèmpel i kontenido na e yamada di gezaghèber John Soleano riba DIA DI LABOR, esta ku union i solidaridat ta garantia pa un lucha sindikal eksitoso i ku tur trahadó mester konosé nan derecho i lucha pa nan derecho.

Ta bon pa esnan den kuido na promé lugá, pero tambe den e otro sektornan realisá ku e lucha di esnan presente na e manifestashon lo ta e motibu prinsipal ku ora logra e 36 ora, boso ku no a hasi sakrifisio tambe lo kosechá.

Kisas un lus por sende òf un vlam di outoreflekshon di boso konsenshi lo por yuda realisá pakiko kada biaha ta hasi un yamada pa afiliá na un sindikato pa e UNION bira mas grandi i kuné e forsa sindikal pa sali na bo defensa, protekshon i mehorashon di bo kondishonnan laboral i bo seguridat i salú na trabou bira mas fuerte.

Bo tin e pruebanan un biaha mas ku e UNION di djasabra ta garantisá ku 36 ora di trabou pa siman lo bira un realidat pronto.

Lo bo no tabata mas orguyoso ku si bo tambe tabata forma parti di e UNION òf bo ta sintibo kómodo bisando laga otro lucha numa pasobra tòg mi tambe lo gosa di nan logro.

E kolumna aki en todo kaso ta yama pabien i alabes ta duna su rèspèt i rekonosementu pa tur ku tabata presente djasabra, na tur ku no tabata por ta presente pero spiritualmente tabata t’ei huntu ku nos i ku huntu nos por bisa na bos haltu, djasabra 15 di ougùstes 2026 nos ta esnan ku a forma parti di kambia i marka historia na Boneiru. Ata nos logro den dos lema: “36 ora: Nos Futuro Ta Kuminsá Awor”, “36 ora: Derecho, Sosiego i Rèspèt.”

FUENTE: NORWIN NÒCHI WILLEM, KONSEHERO USIBO