REPÚBLICA DOMINICANA: CONNECTING THE DOTS: DI TRES ‘REGIONALE NETWERKBIJEENKOMST’ TA SIGUI KONEKTÁ E ANALISTANAN DI REGION.

Santo Domingo,- Mas di kuarenta analista i spesialista riba tereno di kriminologia di aproksimadamente binti pais i isla di Karibe a bini huntu na Santo Domingo pa e di tres enkuentro regional ‘Regionale Netwerkbijeenkomst voor Analisten’ (RNA), e aña akí ku e tema STRATEGIC INSIGHTS: CRIMINAL NETWORKS, FINANCIAL CRIME, DRUG FLOWS AND THE ROLE OF AI.

Kolegio di Hefenan di Polis di e kuater kuerponan den e parti karibense di Reino a organisá e enkuentro ku e meta di fomentá kooperashon regional den e lucha kontra krímen transfronteriso.

Apertura di e enkuentro tabata na enkargo di Leonne van Vlimmeren, embahador suplente di Reino Hulandes pa República Dominicana; visealmirante José Manuel Cabrera Ulloa, hefe di Dirección Nacional de Control de Drogas (DNCD); i Raymond Ellis, hefe di polis di Kòrsou i representante di Kolegio di Hefenan di Polis.

Van Vlimmeren a referí na RNA komo ‘un foro úniko kaminda analista por siña konosé otro mihó, rekonosé sierto patronchi i duna otro sosten transfronteriso.’ Cabrera Ulloa a mustra riba e echo ku krímen organisá ta move rápidamente di un pais pa otro i ku ‘nos reakshon mester ta koordiná, bon fundamentá i basá riba informashon ku nos ta interkambiá ku otro.

’ Ellis a agregá na esei bisando: ‘Analista ta kombiná informashon lòs pa duna un bista kla. Ora analista di diferente isla traha huntu, e retnan kriminal ta pèrdè un di nan bentahanan di mas importante: fragmentashon.’

Durante tres dia, e analistanan di Anguilla, Antigua & Barbuda, Aruba, Boneiru, Fransia, Guyana, Hulanda, Islanan Caiman, Jamaica, Kòrsou, República Dominicana, Saint Martin, Sint Maarten, Saint Lucia, Sürnam, Trinidad & Tobago, Virgin Islands britániko i Virgin Islands estadounidense a presentá nan último análisisnan. Huntu, tur e kontribushonnan akí a duna un bista amplio i detayá di kriminalidat den nos region: tiroteo, sifra di asesinato, tráfiko di droga, violensia hubenil, uso di zona vulnerabel na kosta, kooperashon entre e retnan di diferente isla, krímen sibernétiko i e ròl kada bes mas importante di Inteligensia Artifisial (IA) i plataforma online.

Tabatin tambe algun kontribushon ku a yuda kontekstualisá e desaroyonan akí den un perspektiva mas amplio. Dr. Evan Ellis a deskribí kon kambio geopolítiko ta afektá region di Karibe di manera ku, mas i mas, nos region no ta solamente un ruta di tránsito sino mas bien parti di e kadena logístiko di kokaina i otro merkansia ilegal.

E ekspertonan di Global Initiative Against Transnational Organized Crime (GI-TOC) a mustra kon Karibe a desaroyá pa bira un plataforma pa almasená, re-empaketá i redistribuí kokaina, i a enfatisá e relashon ku tin entre trafikashon di droga i arma di kandela.

E ròl di teknologia i inteligensia a bini padilanti den e kontribushonnan di John Bloebaum i Thom Snaphaan. Nan a mustra ku, pa por hasi análisis di kalidat, mester formulá e preguntanan operativo na un manera skèrpi, i ku ‘financial crime scripting’ ta yuda detektá operashon di labamentu di plaka i froude.

Assistant Commissioner Leonardo Brown, hefe di departamento teknológiko di Jamaica Constabulary Force (JFC), a hasi un presentashon riba desaroyo di rekurso digital den JCF. Representando CARICOM IMPACS, Terrance Roopchan, hefe di e unidat di inteligensia kontra krímen, arma di kandela i gang i di e unidat di apoyo operashonal di Regional Intelligence Fusion Centre, i Dale Joseph, analista hefe di Cyber Fusion Unit, a trata e tendensianan aktual ku por mira den trafikashon di arma di kandela, formashon di gang i krímen sibernétiko. Angelo Brete, hefe di FIU Aruba, a presentá un perspektiva finansiero, mustrando kon transakshon poko usual ta yuda identifiká labamentu di plaka den vários sektor, manera di real estate, wega di plaka, komèrsio internashonal i mas.

E enkuentro tabatin un mensahe sentral masha kla: Menasa regional ta pidi un aserkamentu regional. E analistanan ta mira kon fásil arma di kandela ta move di un isla pa otro, kon medionan sosial ta yuda grupo hubenil riba diferente isla drenta den kontakto ku otro, kon e rutanan di droga ta kambia rápidamente ora preshon oumentá i kon kriminalidat ta probechá di e burakunan ku tin den e kolaborashon. RNA ta yuda sera e burakunan akí, reforsando e kontaktonan personal, agilisando komunikashon, dunando mas akseso na e métodonan analítiko ku ta disponibel i dunando un i tur un bista di e patronchinan ku ta desaroyando.

Kolegio di Hefenan di Polisa sera e enkuentro reafirmando ku lo sigui desaroyá RNA komo plataforma regional anual. Manera CARICOM IMPACS a ekspresá: ‘Kolaborashon no ta kosta nada, fragmentashon sí.’ E edishon di  2026 tambe lo wòrdu organisá den kolaborashon estrecho ku e partnernan di den region.

FUENTE: HEFENAN DI POLIS/LIVE99FM