Redakshon
Kralendijk,- Na margén di e seremonia di huramentu di ex-Ministro di Asuntonan Eksterior di Surinam, Albert Ramdin, komo Sekretario General di e Organisashon di Estadonan Amerikano (OEA), a tuma luga un reunion di nivel haltu pa avansa e kausa di autodeterminashon di Boneiru.
Resientemente James Finies, lider di Pueblo Progresivo Uni, i Davika Bissessar Shaw, presidente di e Bonaire Human Rights Organization, a tene un dialógo stratégiko ku Jorge García Córdova, vicepresidente di e Konferensia Permanente di Partido Polítiko di Latinoamérica i Karibe (COPPPAL), acompaña pa Fausto Liz, vicepresidente di e región Karibe di COPPPAL.
COPPPAL, fundá na 1979 na México, ta un plataforma regional importante ku ta representá 73 partido polítiko progresista for di 30 país. Su mishon prinsipal ta inkluí lucha kontra kolonialismo, promové hustisia sosial, demokratisashon real, distribushon husto di rikesa natural, i uni paisnan di Latinoamérika i Karibe.
E reunion na Washington a enfoká riba e defisit demokratiko i e preokupashonnan tokante derechonan humano na Boneiru, espesialmente despues di e imposishon di e struktura konstitushonal Hulandés na 2010—i e aneksashon di fakto mediante integrashon sin konsensentimento di e poblashon, ku a rechasá masivamente e status impone den e referendum di 2015. E delegashon a enfatisá ku tin un nesesidad urgente pa solidaridat regional i internashonal pa duna sosten na pueblo di Boneiru den su lucha pa iguadad i un futuro husto.
Vicepresidente García Córdova a re-afirmá e kompromiso firme di COPPPAL ku prinsipionan di autodeterminashon i hustisia regional. E a enfatisá e papel históritiko di COPPPAL den sostenimentu di moveshonan pa autodeterminashon den e Karibe, inkluso su sosten duradero na Betico Croes, un miembro fundador di COPPPAL i tata di e moveshon di Status Aparte di Aruba, promé ku su fayesimentu prematuro bou di serkumstansia misterioso despues di un aksidente di auto.
Den un gesto adishonal di solidaridat, COPPPAL a establesé un sekshon lokal na Boneiru na 2023, den kolaborashon ku e Bonaire Human Rights Organization i James Finies, lider di Pueblo Progresivo Uni.
Rudy Croes qepd, ruman di legendario Betico Croes, a hunga un papel importante den e konekshon di e moveshon Boneriano ku COPPPAL. Promé ku su fayesimentu den 2022, Rudy a ekspresá fuerte preokupashon den un video grabá tokante direkshon di liderato polítiko na Boneiru i a duna su sosten kompleto pa James Finies.
E a kompartí su tristeza, ku ta asina ku e región di Karibe ta parsialmente kulpabel pa laga e kosnan sosodé manera nan a sosodé na Boneiru.
E a lamentá ku esensialmente a laga un persona, Ramonsito Booi, a haña e poder pa disidí riba futuro di e isla. Rudy a manda un kritika fuerte na e gobièrnu Hulandés pa abusá di su poder riba pueblo di Boneiru.
Rudy Croes a rekonose e paso importante tuma pa James Finies—ku e ta sostene sin reservashon—pa bai Nashonnan Uní pa solisita ku Boneiru bolbe bek riba e lista di territori no-autogobernante.
Den un akshon fuerte di protesta personal, Rudy Croes a debolbe su Medaya di Oranje-Nassau despues di e detenshon ilegal i supuestamente polítikamente motivá di James Finies riba Dia di Boneiru, 6 di september 2018.
COPPPAL a hasi kompromisonan adishonal ku por representa un krusada históriko den e lunanan ku ta bin. E reunion aki na Washington ta representa un paso signifikante den e fortifikashon di aliansanan internashonal i reforsando e yamada pa dekolonisashon, hustisia i dignidat pa pueblo di Boneiru.
FUENTE: BONAIRE HUMAN RIGHTS ORGANIZATION
GIPHY App Key not set. Please check settings