CLUB RUSH A KUMPLI KU TUR MEDIDA DI SEGURIDAT KU OUTORIDAT A PIDI.

Kralendijk,- Ku profundo tristesa, nos ta lanta nos voz komo organisadó di evento, pa ekspresá nos mas sinsero kondolensia i simpatia na famia i serkerinan di e hoben ku a pèrdè su bida dor di un tiroteo ku a sosodé den mardugá di 8 di yüni, pafó di nos establesimentu.

Nos ta kompartí e dolor i nos ta deseá hopi forsa den e momento di duele aki. Nos di USEE ta lamentá inmensamente loke a sosodé. Nos ta konsiente ku e suseso aki a trese hopi prekupashon den komunidat, i nos ta kere ku ta esensial pa nos para ketu riba algun punto importante.

Nos meta komo organisadó di evento semper ta pa kreá un ambiente kaminda tur hende por pasa un rato agradabel, trankil i sigur.

Pa e evento aki, nos a tuma tur medida di seguridat nesesario, nos a sigui estriktamente tur regla indiká pa KPCN, i nos team interno di seguridat a traha di forma riguroso pa garantisá un ambiente sigur pa tur esnan presente.

Lamentablemente, loke a sosodé pafó di nos establesimentu ta fuera di nos kòntròl. Nos ta konsiente ku algun insinuashon den media i komunidat a surgi ku ta pone e responsabilidat eksklusivamente na nos. Nos ta kere ku esaki no ta husto ni balansa.

Nos ta organisadó di evento ku nos solo meta ta pa kontribuí na e bida nokturno i kultura di Boneiru, pa tur hende, sin distinshon di estilo di músika, i pa biba e arte musikal ku nos ta stima i balorá. Nos ta kontra tur forma di mal komportashon i violensia sin sentido.

Nos ta pone nos habri pa diálogo konstruktivo ku outoridatnan i komunidat, pa mira kon nos por sigui hasi nos aporte na un Boneiru mas sigur, vibrante i hopi aktivo. Nos ta komprometé pa sigui pone seguridat komo prioridat i kolaborá ku outoridatnan den manera struktural pa prevení situashon indeseabel.

Nos ta refutá e insinuashon ku promotornan no ta hasi sufisientemente pa prevení loke ta sosodé riba tereno públiko. seguridat ta un responsabilidat ku nos tur mester tuma serio: outoridatnan, komunidat, organisadó i partisipantenan.

Nos ta pidi ku media i komunidat trata e tema aki ku un nivel di responsabilidat, sin di spekulashon i sin di pone mas preshon desnesessario riba nos organisashon. Pueblo di Boneiru, ban uni i traha huntu pa logra hustisia.

Si bo a mira òf tende algu ku por yuda ku investigashon, por fabor yama polis òf usa e liña di tep anónimo 9310. Bo informashon por ta krusial pa resolvé e kaso aki i pa prevení futuro desgrasia. Nos ta biba pa Boneiru, nos ta traha pa Boneiru, i nos ta kere ku tur hende mester sinti seguridat den nos bida nokturno.

FUENTE: TEAM DI MANEHO USEE