Kralendijk,- Pa motibu di e trayekto eksitoso i fruktífero di sindikalismo na interes di e klase trahadó no ta logrando. E éksito ta sintá den e echo ku trahadónan SI konsientemente a uni forsa den sindikato i nan no a logra para e proseso aki.
Djabièrnè último 6 di yüni sindikalismo na Boneiru a logra otro punto históriko, ora ku pa promé biaha aki na Boneiru e sindikato AFBW a sera un kontrakto kolektivo ku un kompania di seguridat, esta Delta Security Bonaire N.V. Delta ta un di e diferente kompanianan di seguridat ku ta operá riba merkado di Boneiru i kual sektor tin basta problema pa ku kondishonnan laboral di nan empleadonan.
E aspekto aki klaramente a bin dilanti na momento ku e presidente di e mesa di negosashon sr. Alexander Hammer a trese dilanti na firmamentu di e CAO i mi ta sita: “
E CAO aki ta úniko pa e sektor i laga nos spera ku esaki lo ta e trènt, esta ku organisashonnan ta mira ku un bon pakete di kondishonnan laboral i un bon posishon di e kompania den e merkado ta pas ku otro. Laga nos sali for di punto di bista ku bon kondishonnan laboral ta un base pa tur trahadó na Boneiru” Ku e deklarashonnan aki sr. Hammer a deskribí henter e situashon den e sektor di seguridat aki na Boneiru.
Ela mustra ku den futuro ta mihó resultado so e negosashonnan lo trese i ela duna e ehèmpel di vakashon pa e tata ora di hañamentu di yu. Si lei ta preskribí dos dia di verlòf, e CAO a yega na 5 biaha mas tantu ku e lei i ta duna e tata 10 dia di verlòf pa ta un kompaño pa e mama ora esaki haña un baby. Un pabien ta bai na gerensia di Delta, na direktiva di AFBW, na e tim negoshadó di ambos partido, na e dos shopstewardnan i tur e trahadónan di Delta ku a para firme pa a logra e CAO aki.
Tur kos no ta reglá, pero si e fundeshi ta bashá pa sigui konstrui un kompania fuerte i un kompania ku ta realisá e balor agregá di su trahadónan ku ta duna diariamente e servisio 24 ora pa dia. Ta di spera ku trahadónan di e otro kompanianan di seguridat tambe bula e sombra di miedu i tuma e kurashi di afiliá na un sindikato. Tin un kompania sigur ku ya a aserká AFBW pa afiliá su trahadónan. Si e otronan tambe yega serka, sindikalismo por dal e siguiente paso den e desaroyo positivo aki, esta pa negoshá i sera un CAO básiko pa tur trahadó den e sektor di seguridat.
Sindikalismo a skucha bon e gritu ku a sali na defensa di kompanianan di kontratistanan, kompanianan di transporte i kompanianan di importashon di material di konstrukshon. Gritunan pa salbaguardiá eksistensia i kontinuidat di e kompanianan.
Hopi di lamentá ta si ku no a hasi esfuerso pa organisá e trahadónan di e kompanianan ku a lo largo lo por bira viktima di e situashon. Trahadónan den e sektor ei ku eksepshon di dos kompania, esta Kooyman i BWM ku ta miembro di e Asosashon di Kontratistanan ku a lanta resien NO ta organisá. Esaki ta hasi imposibel pa sindikato representá nan.
Nos leinan ta preskribí pa sindikato sinta na mesa ku dunadó di trabou, e mester demonstrá ku e tin mayoria di e trahadónan di e kompania inskribí komo miembro. Pues en bes di sali komo el yanero solitario sin dato pa supstansiá, lo ta bon pa hinka esfuerso i energia i konvensé trahadó den sektor di konstrukshon pa di un forma urgente afiliá na un sindikato òf lanta nan propio sindikato.
Den e situashon aktual e trahadónan den e sektor no tin forsa, nan ta kompletamente na merset di e dunadó di trabou i fásilmente ta ser usá pa metanan ku no ta na nan interes. Sindikalismo ta e bos legal di e trahadó ku ta eksigí rèspèt i rekonosementu di e klase trahadó.
I den e último añanan sindikalismo a proba ku echos i no ku palabra ku tantu gobièrnu lokal, komo gobièrnu di Ulanda, pero tambe organisashon di dunadónan di trabou manera Buisines Federation di Boneiru. BBE. Bonhata, Kámra di Komersio i dunadónan di trabou no afilia ta respetá i rekonosé e UNION SINDIKAL BONERIANO, USIBO komo digno i serio representante di e klase trahadó.
Ku USIBO na mesa ta un partner konfiabel, ku ta duna rèspèt i eksigi rèspèt i semper ta dialogá a base di argumentu sano i no a base di emoshon i sigur no for di un ángulo di politika partidista. Esaki tambe durante su diskurso djabièrnè sr. Alex Hammer a bosiferá klarito.
Ela bisa; E balor na mesa, rèspèt pa otro, yega na tempu kumpli ku palabrashonnan, bisa loke bo ta hasi i hasi loke bo ta bisa. Esei tabata reflehá na mesa di negosashon.
FUENTE: NÒCHI WILLEM/LIVE99FM

GIPHY App Key not set. Please check settings