Redakshon
Kralendijk,- E Asosashon di Haitianonan na Boneiru a invitá nos di Fundashon ‘Union di Imigrantenan Bonerianonan’ (FUIB) pa papia over di asuntunan relashoná ku imigrashon.
Un di e puntonan ku a keda papiá ta e hecho ku Servisio di Imigrashon di Kòrsou a introdusí un maneho suavisá pa ku Haitianonan (‘gedoogbeleid’).
Esei debí na e hecho ku Haiti a kai den un sorto di guera sivil entre gobièrnu y diferente bandanan kriminal. Vooral na e kapital Port-au-Prince. Un situashon hopi lamentabel, ku gobièrnu di Haiti tin hopi difikultat pa kontrolá.
A deklará e ‘estado di emergensia’ na Haiti.
E maneho suavisá ta enserá entre otro ku Haitianonan ilegal lo no wòrdu deportá si polis of ofishalnan di imigrashon ta enkontrá nan. Nan tin ku mèldu na gobièrnu sí, pero nan lo no wòrdu deportá.
FUIB a aserká IND pa puntra si na Boneiru IND tambe lo bai hiba un maneho suavisá pa ku Haitianonan? E kontesta tabata negativo. Te ainda nò. Tin kontakto entre IND ku Hulanda over di esaki, pero te ainda no tin desishon. Pues te ainda NO tin un maneho suavisá pa ku Haitianonan na Boneiru.
FUIB ta sugerí pa Haitianonan ilegal na Boneiru por purba pidi asilo polítiko. E hecho ku tin un ‘estado di emergensia’ na Haiti por ta base pa nan por haña asilo polítiko na Boneiru. Tuma kontakto ku FUIB, anto nos lo informá. Fásil lo no ta. Pero ta posibel sí. Ta dependé di prueba y sirkunstansianan.
Por tuma kontakto ku Direktiva di FUIB na telefòn 787 2373 of ku abog. Bijkerk na telefòn 796 2650. Normalmente imigrantenan por pasa libremente na nos Konsultorio grátis tur djasabra pa 4’or te 6’or di atardi, pero djasabra benidero 10 di mei 2025 e Konsultorio lo ta será pa motibu di ousensia di abog. Bijkerk. For di 17 di mei e Konsultorio lo ta habrí atrobe.
FUENTE: FUNDASHON ‘UNION DI IMIGRANTENAN BONERIANO
GIPHY App Key not set. Please check settings