SOSTEN MORAL Y FINANSIERO FOR DI BES (Y CAS) PA HULANDA Y UKRANIA.

Kralendijk,- Tempu a yega pa Konseho Insular ekspresá su mes tokante e peliger pa nos demokrasia komo konsekuensia di e guera di Rusia/Ukrania.

Nos ta mira ku Merka a kuminsá dekaí. Falta di rèspèt pa demokrasia y estado di derecho ta birando mas y mas visibel einan.

Nos ta mira tambe kon Europa ta tambaleando y basilando, miéntras ku sosten di NATO for di Merka a bira insigur. Pues Europa mester kuminsá hala e garoshi pa defendé tantu Ukrania komo su mes kontra e peliger di outokrasia ku kanselashon di derechonan humano.

Nos ta un isla chikitu y nos no por hasi hopi den e konteksto aki. Pero nos por hasi algu sí. Tempu a yega pa nos Konseho Insular kuminsá wak un tiki mas aleu ku Boneiru so. No solamente nos ta un parti integral di Hulanda, pero nos ta situá hopi serka di e kosta di un pais ku ta sostené Rusia y ku ta menasá su pais bisiña Guyana.

Boneiru a sali dilanti di e otro islanan un biaha kaba na 2004, tempu ku el a ekspresá su mes pro integrashon den Hulanda. Loke a pasa tambe. Esaki tin bentaha y desbentaha. Y te ainda e laso ku Hulanda no ta loke e mester bira. Pero nos por regla esei den bon konsulta ku Hulanda na su debido tempu.

Pero AWOR a surgi un situashon internashonal ku nos islanan tin ku aktua riba dje. Nos ta spera ku Boneiru dilanti un biaha mas. E mínimo ku nos por hasi ta pa Konseho Insular deklará ku Hulanda por stèns riba nos te kaminda nos por. Probablemente Boneiru lo no haña su mes involukrá den aktonan di guera, pero pa Europa esei no ta sigur ètòl.

Y Hulanda ta Europa. Y p’esei Boneiru tambe ta Europa.

Boneiru por deklará ofishalmente ku e ta solidario ku Hulanda. Pero palabra so ta barata. Nos (BES ku CAS) por rekoudá fondonan pa manda Hulanda y Ukrania. Ni maske por ta un montante chikitu. E meta ta pa mustra nos sosten moral. Situashon pa Hulanda mes lo bira difísil tambe. Y Ukrania tin hopi problema serio kaba. Anto indirektamente e sòldánan di Ukrania ta bringando pa nos libertat, demokrasia y derechonan humano tambe.  

Ta p’esei nos a aserká Representante di Reino huntu ku Gezaghebber a base di e karta athunto. Den e karta ei nos ta proponé pa lanta un fondo (nòmber mas mihó: Fondo BES-Hulanda-Ukrania) pa rekoudá donashonnan boluntario di siudadano- y kompanianan pa manda Hulanda pa distribuí bou di e resipientenan konserní. Boneiru por sostené e idea aki públikamente y instruí ofishalnan di gobièrnu pa duna asistensia. Y Boneiru mes tambe por hasi un donashon pa demostrá ku Hulanda por konta ku nos.

Hustamente nos semper ta pidi yudansa di Hulanda. Pero e biaha aki nos ta duna sosten na Hulanda. Tambe hustamente. .

Resipientenan di e donashonnan lo ta:
A) Hulanda mes pa yuda lanta un Forsa Defensor Europeo;
B) Ukrania pa kumpra produktonan médiko;
C) Ukrania pa yuda rekonstruí su pais.

Esnan ku ta hasi donashon por indiká kua di e 3 metanan nan kier favoresé.

Representante di Reino a kontestá mesora ku e no por hunga un ròl den esaki. Y, pensando bien, en bèrdat ta mihó ku e no ta mete den esaki. Esaki mester sali for di Boneiru mes. Y, despues di nos inisiativa, nos ta spera ku e lo sali for di e otro islanan tambe.

Despues nos a aserká Gezaghebber apart tambe. Pero despues di un periodo razonabel, e no a kontestá nos ètòl. Ni nò, ni sí, ni kisas. Ta p’esei nos ta aserká Konseho Insular awor. Y atrobe, pensando bien, kisas en bèrdat esaki mester sali for di e seno di polítika Boneriano. Pero si Konseho Insular tampoko no kier mete, e ora ei nos lo lanta un Komité di Siudadano pa hasi’é.

Mirando ku awor polítika tambe ta envolví, e karta aki ta bai prensa tambe.

Nos ta pidi Konseho Insular pa debatí over di e asuntu aki debidamente y pa tuma akshon efektivo.

Naturalmente nos ta dispuesto pa yuda.

FUENTE: MR. M. BIJKERK