NASHONAN UNI TA KONFIRMA RISIBI KARTA DI DENUNSIA DI BONAIRE HUMAN RIGHTS.

Kralendijk,- Organisashon di Derecho Humano di Bonaire, Ministerio Evangeliko Di Akshon  i SC Labor Union STrAF Divishon Bonaire, Statia, i Saba ku satisfakshon ta anunsiá ku Nashonan Uni a konfirmá ofisialmente ku nan a risibí nos karta, ku nos a manda dia 29 di mart, 2025, na atenshon di e Sekretario General.

Den e karta di denunsia, nos a ekspresá nos preokupashon serio riba e karta kontroversial resiente di gezaghebber John Soliano, ku a kausa temor I paniko bao di e poblashon lokal. Gezaghebber Soliano a pidi Minister Brekelmans di Defensa i Veldkamp di Relashonan Eksterior pa konsiderá Venezuela komo un menasa militar, ku lo hustifika posibel intervenshon militar i establesimento di un base di NATO riba Bonaire. Nos ta kere ku e akshonan aki por provoka eskalashon militar i desestabilisa e region di Karibe, ku a wordu deklara komo Zona di Paz.

Basa riba e karta di Soliano miembronan di 2de Kamer, Van Der Werf i Paternotte, a hasi preguntanan adishonal na e Ministernan di Defensa i Asunto Eksterior —preguntanan ku no tabata inklui den karta di gezaghebber. Na manera notabel, e miembronan di parlamento di D66 a ekspresa ku gezaghebber Soliano a informá ku aktividad militar venezolano a wordo observa serka di Boneiru.

Komo reakshon, nos a manda un karta na Prome Minister Hulandes, Ministernan di Defensa i Asuntos Eksterior, 2de Kamer I 1ste Kamer, pidi nan pa revoka e karta provokativo di gezaghebber Soliano i trata e karta komo no manda. Nos a pidi tambe pa de-eskalá kualke provokashon militar pa mantene paz i neutralidad di region di Karibe.

Nos ta opone fuertemente kontra husá e krisis di refugiadonan di Venezuela komo hustifikashon pa establese un base militar NATO riba Bonaire. E situashon humanitario di migrantenan  venezolano no mester wordu manipula pa sirbi agendanan geopolítiko of militar. Tambe ta preokupante ku ex Prome Minister di Hulanda, Mark Rutte, ta Sekretario General di NATO, I ta den e posishon aki awor na mes momento ku tenshonan ta eskalándo.

Ademas, Aruba resientemente a rechaza e proposishon di gobièrnu Holandes pa establese un base militar riba Aruba, ku ta resaltá oposishon pa inisiativanan asina den region.

E eskalashon militar propone pa Soliano ta un menasa direkto pa paz i seguridat di Karibe i ta kontra e deseo di pueblo di Bonaire I Karibense ku ke mantene neutralidad i no wordu involukrá den konfliktonan militar ekstranhero.

Rekonosiemento di Nashonan Uni di nos preokupashon ta un paso signifikativo, ku ta mustrá ku nos esfuersonan pa haña atenshon ta wordo tende na nivel internashonal di mas haltu. Nos alavez ta rekonosé e trabou inkansabel di James Finies, lider di Pueblo Progresivo Uni, den lucha pa nos derechonan humano i pone luz riba e inhustisia ku nos ta enfrentándo.

Nos lucha pa hustisia, dignidad, i autodeterminashon ta kontinua, i nos ta permanese dedika pa segurá ku bosnan di pueblo di Bonaire ta wordu skucha i nan derechonan wordu respetá.

FUENTE: BONAIRE HUMAN RIGHTS ORGANIZATION/LIVE99FM