REFUGIADONAN POR PIDI ASILO POLÍTIKO NA BONEIRU.

Kralendijk,- Pa un of otro motibu refugiadonan polítiko ta kere ku na Boneiru no ta posibel pa pidi asilo. Esei ta un pensamentu eróneo. Art. 12a di Lei di Atmishon y Ekspulshon ta habri e kaminda pa pidi asilo politiko na Boneiru.

Pues e ta posibel. Por ehèmpel, Haitianonan y Venezolanonan por pidi asilo polítiko na Boneiru, si nan por prueba ku nan ta of lo wòrdu persiguí na nan propio pais.

Pero mester bisa aserka ku e NO ta fásil. Ta hopi difísil pa un refugiado prueba ku en bèrdat e lo wòrdu persiguí si e tin ku regresá na su propio pais. Pero no ta imposel. Por purba.  

Mientras gobièrnu ta prosesando e petishon pa asilo, e refugiado por keda na Boneiru. Pero gobièrnu di Boneiru NO ta duna e refugiado un lugá di keda. Gobièrnu di Hulanda tampoko, ounke na Hulanda mes refugiadonan polítiko sí ta haña alohamentu.

Den pasado nos a pidi gobièrnu pa duna refugiadonan pèrmit pa nan traha mientras nan petishon pa asilo ta wòrdu prosesá y durante tratamentu di posibel kasonan den Korte. Gobièrnu a rechasá nos petishon. Nos ta haña esei mashá inhustu. Mayoria biaha refugiadonan politiko no tin sèn. Kon nan por biba, si nan no mag traha y si gobièru no ta duna nan ònderstant tampoko? Naturalmente nan ta bai traha ilegalmente tòg. Nan tin ku biba.

FUIB ta di opinion ku gobièrnu di Hulanda mester trata refugiadonan politiko na Boneiru igual ku refugiadonan polítiko na Hulanda. Siguiente biaha ku un persona ta pidi asilo polítiko na Boneiru, anto e no ta haña pèrmit pa traha, FUIB lo wak pa entamá un kaso sumario kontra gobièrnu pa korigí e trato inhustu aki.        

  

Kualkier imigrante ku ta deseá di haña mas informashon presiso over di esaki of otro problema hurídiko por tuma kontakto ku Direktiva di FUIB (yama: 787 2373) of por pasa libremente na nos Konsultorio hurídiko grátis tur djasabra di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

FUENTE: FUIB – ABOG. M. BIJKERK/LIVE99FM