ENSENANSA SIENTIFIKO

Kralendijk,- “Man den man, biblioteka nos ta ban” kisas no ta papiamentu korekto pero sigur ta kai bou di libertat poétiko.

Biblioteka públiko a muda pa un edifisio nobo, mas espasioso i mas grasioso pa bishitá. E intenshon ta pa Bonaire haña un biblioteka nobo moderno ku ta kuadra ku eksigensia di ta unu moderno ku ta operá independiente. Biblioteka ta importante den e infrastruktura di edukashon i enseñansa. Mirando ku e kadena di enseñansa ta responsabilidat di Hulanda ta nesesario i urgente pa Bonaire urgi pa inisiá un proseso pa yega na un HBO tumando na kuenta ku di akuerdo ku CBS poblashon di Bonaire lo ta tinta mil sinkushen na 2035.

E kresementu aki ta pone un perso grandi riba e pilánan importante ku ta karga Bonaire ku ta; WEB, Stinapa, Fundashon Mariadal ku su akademia ,Telekomunikashon, BIA I Haf.  Nan tin nesesidat di profeshonal, pa kuminsá, riba nivel di HBO.

No por warda te ora yega 2035, pero mester dal stap den direkshon di krea na Bonaire mes, profeshonalnan pa aportá na desaroyo di Bonaire. Nos ta na un krusada pa skohe entre sigui ku dependensia di konosementu antikuá ku ta lèn riba pasado ku ta promové mediokresidat i leu di  ta kritiko òf skohe pa abitantenan kritiko, independiente i responsabel.

Pa logra estudio na nivel mas haltu ku MBO tin kaba un fundeshi sólido ku un libreria, biblioteka i SGB. Dedikashon i desishon bon fundá awor ta serka diputado di enseñansa i kultura. E promé stap mester ta, aserká akadémikonan na Bonaire i presentá Hulanda un plan konkreto pa realisá e nesesidat di un HBO na Bonaire i eksigí ku diputado mester ta miembro ku partisipashon kompletu den e konsulta di kuater pais riba tereno di enseñansa, kultura I siensia  ku ministernan di Aruba, Kòrsou I Sint Maarten ku sí tin nan universidat. “Man den man, pa un HBO nos ta ban”

Di e forma aki ta bira interesante pa akadémikonan boneriano den eksterior bini Bonaire sin ta dependé di gobernantenan.  

FUENTE: ARTHUR SEALY/LIVE99FM